A alcaldía da Coruña está no aire
Nin sequera o PP pactando con Ciudadanos, nin tampouco o PSOE pactando coa Marea Atlántica e o BNG terían opcións de gobernar na capital herculina con maioría absoluta, segundo unha enquisa universitaria.
Por Galicia Confidencial | A Coruña | 13/04/2015 | Actualizada ás 23:12
A situación electoral na Coruña a piques de comezar a campaña non está aberta, está abertísima. Esta é unha das conclusións que se pode tirar das enquisas que ven publicando a Facultade de Socioloxía local.
O PP perdería catro dos seus catorce concelleiros, quedando en dez. Carlos Negreira estaría moi lonxe da maioría absoluta actual, situada en catorce representantes. Nin sequera nun hipotético pacto con Ciudadanos -que entraría con tres edís- podería sumar unha maioría estábel.
Se Negreira -condenado a pactar con alguén- non lograr cortexar con éxito a Ciudadanos, a pelota caerá na bancada do PSdeG e incluso da Marea Atlántica.
Mar Barcón, do PSdeG, podería sumar os seus seis edís (agora ten oito) aos cinco da Marea Atlántica -que apoian EU, Podemos e ANOVA entre outros- superando ao PP. Sumando ao BNG -que perdería a metade dos seus representantes até obter só dous concelleiros- un hipotético pacto de esquerdas superaría ao PP en solitario, e empataría coa suma dos conservadores co partido de Albert Rivera -impulsado pola recente crise de UPyD.
Esta última hipótese daría a chave a Unión Coruñesa, que podería obter un concelleiro. As 200 enquisas semanais que ven facendo Sociología durante as últimas dúas semanas danlle un 4%, moi preto do 5% necesario para entrar no Concello. O resultado está polo tanto no aleiro. Admítense apostas.
