Máis de 120 ferroláns e ferrolás con discapacidade poderán conseguir traballo

O alcalde de Ferrol, José Manuel Rey Varela (PP), asegurou que "esta cidade ten como obxectivo ser máis accesible, máis inclusiva", pero que ademais "o emprego é un dos instrumentos que promove a igualdade de oportunidades" e que por iso desde unha entidade como "COGAMI traballan en defensa das persoas con discapacidade, teñen empresas con persoas con discapacidade e queren ademais pechar un círculo tan interesante como é o da inclusión".

Ditas manifestacións realizounas o rexedor ferrolán no mediodía deste xoves no Consistorio, onde asinou un novo convenio de colaboración co presidente de COGAMI, Anxo Queiruga, por 15.000 euros, 5.000 máis que o anterior. Así, detallou que "os datos son extraordinarios e detrás de todos hai persoas, persoas neste caso que teñen unha discapacidade, e que, a través dun servizo como este, 128 persoas conseguirán un emprego", o que o levou a trasladar que "imos seguir colaborando, imos ampliar as nosas colaboracións en defensa das persoas con discapacidade, para que COGAMI siga conseguindo máis insercións laborais". Por último, o rexedor detallou que este convenio o que busca é "financiar unha parte dos servizos de intermediación, orientación e prospección de emprego".

"CONVENIO NECESARIO"

Pola súa banda, Anxo Queiruga, indicou que este é "un convenio de colaboración para a inserción laboral de persoas con discapacidade, que é totalmente imprescindible, porque as taxas de desemprego das persoas con discapacidade duplican as da poboación en xeral". No caso da oficina de Ferrol detallou que "temos, máis de 2.000 persoas inscritas como demandantes de emprego, das que case 750 son deste municipio".

Tamén destacou a importancia da formación, xa que "ultimamente fixemos catro cursos de formación, onde xa se atopou traballo a cinco persoas, que xa están a traballar, pero neste ano atopouse traballo a 54 persoas con discapacidade". Por último, defendeu que para eles o emprego é "unha ferramenta básica, non só na inclusión laboral, senón na inclusión social, pois significa unha independencia económica, da relación social e as persoas poden tomar as rendas da súa vida", sentenciou.