Detido un veciño de Tordoia por 3 roubos en negocios, 4 furtos de vehículos e tenencia ilícita de armas
A Garda Civil comprobou que a súa vivenda estaba conectada á rede eléctrica de forma fraudulenta.
Por E.P. | SANTIAGO DE COMPOSTELA | 08/08/2023 | Actualizada ás 11:24
A Garda Civil detivo a un home veciño de Tordoia en relación con tres delitos de roubo con forza, catro de furto de uso de vehículos a motor e tenencia ilícita de armas. Ademais, atribúeselle unha defraudación do fluído eléctrico, xa que a súa vivenda estaba conectada á rede pública ilegalmente.
Segundo informa o Instituto Armado nun comunicado, a investigación deste home comezou por mor de dous atracos en farmacias, unha situada en Cerceda e a outra en Tordoia. Así, os axentes comprobaron que o agora detido forzara a porta para acceder ao interior e substraer diñeiro en efectivo. De feito, para cometer o ilícito, furtara un vehículo en Carballo.
Así mesmo, froito da investigación, o pasado mércores, día 2 de agosto, a Garda Civil localizou nas inmediacións da súa vivenda un furgón con aparentes signos de ser roubado. Así figuraba no Centro Operativo de Servizos (COS).
Como o home non abandonaba a vivenda, os actuantes solicitaron ao Xulgado de Instrución número 1 de Ordes unha orde de entrada e rexistro. Tras a súa detención, os investigadores comprobaron que, no domicilio, a instalación eléctrica estaba conectada á rede de maneira ilícita, sen que por agora se puidese estimar a cantidade económica que supuxo esta fraude.
A Garda Civil puido así recuperar dous vehículos, un furgón dunha empresa de aluguer, unha ganzúa artesá empregada para forzar os automóbiles, unha arma corta de lume, diversos obxectos posiblemente subtraídos e outra serie de indicios que están a ser analizados.
