Rueda teima en que a Xunta aprobará os seus orzamentos sen coñecer as cifras do Estado
O presidente da Xunta declarou que o Goberno só ten executados o 22% dos fondos que se reservou "en exclusiva" que Galicia e outras comunidades pediron transferir ás comunidades para a súa xestión.
Por E.P. | SANTIAGO DE COMPOSTELA | 28/09/2023 | Actualizada ás 15:27
O presidente da Xunta, Alfonso Rueda, informou este xoves, tras a reunión do Consello, da aprobación da conta xeral da Comunidade correspondente a 2022, a cal supuxo "cumprir os obxectivos en canto a déficit e débeda pública". Así, coa reivindicación de autonomía "cumpridora", advertiu de que "non ten ningún sentido, non é admisible" que se poida "premiar" ás que non o fan e fixo referencia a "eses 450.000 millóns de euros que están a reclamar as menos cumpridoras", en referencia velada a Cataluña.
"Volvemos reivindicar este ano, máis que nunca, que non podemos admitir que se premie con esas cantidades descomunais e absolutamente disparatadas coas que non están a cumprir", reprobou Rueda, quen defendeu que Galicia pechou 2022 cun déficit do 0,5 por cento do PIB, unha décima menos que en 0,6, que era a previsión inicial. Ademais, a taxa de endebedamento foi do 17,2 por cento, tres décimas por baixo do previsto e o que supuxo, por tanto, "unha mellora sobre o obxectivo inicial".
Así mesmo, e tras defender tamén que Galicia está á cabeza de pago a provedores, con 15 días de media fronte aos 25 da media nacional, Rueda advertiu de que, "fronte ás falsas afirmacións", a galega é a Comunidade (do sistema xeral) que menos incrementou a súa débeda desde 2008.
Ademais, o mandatario galego remarcou que Galicia mantivo o "nivel investidor", cun 13 por cento do gasto non financeiro destinado a investimentos. "Somos unha comunidade cumpridora, responsable co uso dos fondos públicos", salientou Rueda, quen tamén fixo balance de execución dos fondos europeos do mecanismo de resiliencia.
Dos recibidos, 1.341 dos 1.384 que ten asignados Galicia, executáronse o 70 por cento en global e o 80 por cento se se teñen en conta os 527 millóns deste ano. "Temos un nivel de execución francamente bo", defendeu Rueda, quen dixo que aínda faltan 40 millóns por transferir dos que por agora non teñen constancia.
Estas cifras comparounas cos datos da Administración central, que só ten executados o 22 por cento, dos fondos que se reservou "en exclusiva" para o seu desembolso e que Galicia (ademais doutras comunidades) pediron transferir ás comunidades para a súa xestión, porque "hai Pertes industriais que están a esperar" por eses investimentos. Así, dixo que os datos da Administración estatal "fan máis evidente a reclamación dunha cogobernanza que se nega".
ORZAMENTOS AUTONÓMICO
Sen saír do plano económico, Rueda indicou que seguen sen "novidade" con respecto á elaboración do orzamento, é dicir, non teñen ningún dato para facer os números e fixar o teito de gasto con exactitude.
En todo caso, ratificou que os galegos "non se poden ver prexudicados polo Goberno central" e que a Xunta, por tanto, traballa e elabora unhas contas para 2024 que incluirán algunhas medidas que adiantará durante o debate sobre o estado da autonomía deste mes de outubro.
En todo caso, o mandatario galego sospeita que se non se coñecen as cifras é porque "van ter que atender ás reclamacións" do "prezo da investidura". "Galicia volverá ter orzamentos", garantiu, en todo caso, o presidente da Xunta.
