Dous homes feridos, un na UCI, tras unha pelexa en Ferrol
Tanto el como o seu agresor, que está tamén ingresado, contan con vixilancia policial.
Por Europa Press / Redacción | SANTIAGO DE COMPOSTELA | 02/11/2023 | Actualizada ás 15:51
Un home de 47 anos, residente en Ferrol, atópase en estado grave tras unha pelexa rexistrada na tarde de pasado martes, 31 de outubro, en pleno barrio da Magdalena, concretamente na rúa Sánchez Barcaiztegui.
Segundo fontes consultadas por Europa Press o incidente produciuse tras unha discusión con outro home, tamén de 47 anos, pero natural de Burgos, na súa propia vivenda, supostamente porque lle colleu unhas chaves.
Tras o altercado, ambos levaron a discusión á rúa, momento no que o ferrolán aproveitou para picar cunha navalla ao outro home, pero este logrou tiralo ao chan e comezou a patealo na cabeza, chegando a perder o coñecemento debido aos golpes recibidos.
Foi entón cando á zona acudiron axentes da Policía Local de Ferrol, ademais da Policía Nacional, así como efectivos de Urxencias Sanitarias de Galicia-061, que trasladaron aos dous feridos ao hospital Arquitecto Marcide, con custodia policial.
O home que foi golpeado na cabeza foi entón levado ao Complexo Hospitalario Universitario da Coruña (Chuac), debido á gravidade das feridas, onde permanece ingresado, mentres que o seu presunto agresor está ingresado no Complexo Hospitalario Universitario de Ferrol (CHUF), con vixilancia policial en ambos os casos.
