Novos atrasos nos trens de Renfe por segundo día consecutivo
A media mañán deste luns, Renfe confirmou que xa se recuperou a operativa habitual. A Xunta pide que se solventen os problemas canto antes.
- O delegado do Goberno en Galicia volve repetir que traballan para "evitar atrasos nos trens"
- Novos atrasos nos trens que unen Vigo e A Coruña por incicencias técnicas
Por Galicia Confidencial | A Coruña | 21/11/2023 | Actualizada ás 08:48
Novos atrasos nos trens de media distancia de Renfe en Galicia a pesar das promesas do delegado do goberno en Galicia deste luns prometendo melloralas. Desta volta os atrasos acumúlanse nalgúns dos trens da mañá entre Vigo e A Coruña con máis dunha hora de diferencia o que afecta a centos de pasaxeiros.
Segundo fontes da compañía consultadas por Europa Press, esta incidencia afectou o tren que partía da Coruña con destino Ourense pasadas as 05,00 horas, que finalmente saíu unha hora máis tarde. Esta situación xerou un efecto dominó, afectando o traxecto de regreso (Ourense-A Coruña), realizado polo mesmo convoi, que se atrasou uns 50 minutos.
Ademais, o mesmo tren era o encargado de levar a cabo a viaxe entre A Coruña e Vigo ás 08,00 horas, polo que tamén rexistrou unha demora duns 50 minutos. A pesar de todo, a esta hora Renfe confirmou que xa se recuperou a operativa habitual, debido a que esa máquina non tiña que realizar o traxecto de volta xusto á súa chegada, o que permitiu evitar así máis atrasos. A empresa nesta ocasión non puxo en marcha unha alternativa por estrada para os usuarios, que tiveron que esperar a que saíse o seu tren. Todo iso despois de que este pasado luns tamén se producisen varias incidencias técnicas nos trens que unen Vigo e A Coruña, provocando atrasos á primeira hora.
A XUNTA PIDE
Pola súa banda, a conselleira de Infraestruturas e Mobilidade, Ethel Vázquez, pediu ao Goberno central que resolva "canto antes" as incidencias rexistradas no servizo ferroviario galego nos últimos tempos.
Para a representante da Xunta, "é evidente que hai un problema de xestión" neste ámbito que está a causar "moitos atrasos e incidencias e, por tanto, moito malestar entre usuarios". "Vemos esas incidencias non só en liñas que teñen problemas de modernización da rede, senón tamén en liñas renovadas e modernizadas como o eixo atlántico, onde vemos atrasos, falta de prazas, trens obsoletos e incidencias constantes que provocan un malestar enorme nos usuarios", manifestou.
Por iso, pediu ao Executivo central que "tome cartas no asunto" e resolva esta problemática "canto antes". Tal e como trasladou a conselleira, leste debería ser "o primeiro asunto que resolva o novo ministro de Transportes, Óscar Puente".
