A Xunta reclama ao novo ministro de Cultura que apoie a candidatura da Ribeira Sacra a Patrimonio da Humanidade
O conselleiro de Cultura enviou ao novo ministro, Ernest Urtasun, unha carta na que o informou de diversos asuntos prioritarios para a cultura galega, entre eles, a candidatura da Ribeira Sacra.
Por E.P. | SANTIAGO DE COMPOSTELA | 03/12/2023 | Actualizada ás 12:40
O conselleiro de Cultura, Educación, FP e Universidades, Román Rodríguez, solicitou ao novo ministro de Cultura, Ernest Urtasun, que manteña o apoio do Goberno central á candidatura da Ribeira Sacra a Patrimonio da Humanidade.
Segundo trasladou a Xunta nunha nota de prensa, "consciente de que esta carteira experimentou diversos cambios nos últimos anos, cun total de cinco ministros desde 2018", Román Rodríguez confía en que, tamén nesta nova etapa, "continúe a interlocución" entre ambos os departamentos despois do "intenso traballo desenvolvido ao longo de tempo na procura da declaración".
Así, esta semana, o representante autonómico remitiu a Ernest Urtasun unha carta na que o informou de diversos asuntos prioritarios para a cultura galega, entre eles, a candidatura da Ribeira Sacra.
"Confiamos e agradecemos anticipadamente que o seu Ministerio continúe apoiando a candidatura a Patrimonio Mundial da Ribeira Sacra, un proxecto no que Galicia se envorcou para protexer e valorizar a paisaxe cultural excepcional que conforma", afirma o conselleiro na misiva.
Así mesmo, lembra que desde que comezaron os primeiros traballos da candidatura, en 2017, a administración autonómica investiu 7,2 millóns de euros para "recuperar, mellorar, estudar, rehabilitar e garantir a conservación e posta en valor de 44 bens patrimoniais das provincias de Lugo e Ourense".
