Tres anos de cárcere por enganar a un home para que lles dese máis de 130.000 euros
Por Europa Press / Redacción | A CORUÑA | 09/12/2023 | Actualizada ás 11:25
A sección primeira da Audiencia Provincial da Coruña acollerá este martes o xuízo contra tres persoas, acusadas por Fiscalía dun delito de estafa continuada por enganar a un home para que lles prestase varias cantidades de diñeiro que, en total, sumaron polo menos 133.569 euros. Segundo o escrito do Ministerio Público, os tres procesados, dos cales dous tiñan antecedentes penais, servíronse de "artimañas" para solicitarlle o diñeiro "co pretexto de que pasaban por unha situación precaria" e ante a necesidade de "axudar a terceiras persoas que tiñan graves problemas de saúde e tiña que viaxar a Houston".
Chegáronlle a facer crer que os querían matar e que, para evitalo, necesitaban o diñeiro. Ademais, fixéronse pasar por policía, xuíz e fiscal a través do móbil. A vítima creu todo iso de boa fe, de tal forma que, en varias ocasións, desde febreiro de 2015 e ata 2017 (presentou denuncia en febreiro dese ano), deulles diversas cantidades en man e a través de transferencias bancarias que sumaron polo menos 133.569 euros.
En agosto de 2017, un xulgado da Coruña emitiu un auto polo que prohibía a unha das tres acusadas comunicarse e achegarse a menos de 500 metros da vítima, á que antes dos feitos prestara servizos sexuais. Por todo o relatado, a Fiscalía solicita para estas tres persoas respectivas penas de tres anos de prisión por delitos de estafa continuada.
