Tráfico reparte 400 chalecos reflectores dentro dunha campaña para previr atropelos nas estradas de Pontevedra
Na provincia de Pontevedra, no que vai de ano, figuran rexistrados, en vía interurbana, seis peóns atropelados falecidos. Desde o ano 2019 ata a actualidade, en vía interurbana, o número de peóns atropelados nas citadas vías con resultado mortal foi de 14.
Por Europa Press / Redacción | PONTEVEDRA | 18/12/2023 | Actualizada ás 17:02
A Dirección Xeral de Tráfico (DGT) puxo este luns en marcha un plan especial de prevención de atropelos nas estradas da provincia de Pontevedra, co obxectivo de concienciar aos peóns e ao resto de usuarios cos que conviven, sobre a importancia de facerse ver na estrada.
Para iso, axentes do Subsector de Tráfico de Pontevedra da Garda Civil comezaron a entregar 400 chalecos de alta visibilidade a aqueles camiñantes e outros usuarios que se despracen polas vías sen facer uso deste tipo de pezas. A distribución dos chalecos comezou nun punto de paso de peregrinos da parroquia de Portela, no Concello de Barro.
Na provincia de Pontevedra, no que vai de ano, figuran rexistrados, en vía interurbana, seis peóns atropelados falecidos, o que implica un importante aumento con respecto a anualidades precedentes. Cabe indicar que desde o ano 2019 ata a actualidade, en vía interurbana, o número de peóns atropelados nas citadas vías con resultado mortal foi de 14.
En canto aos condutores, a DGT lembra a obrigación de levar as luces do vehículo acendidas en caso de pouca luminosidade ou de meteoroloxía adversa, xa que tamén deben facerse visibles aos demais usuarios da vía, e moderar a velocidade en zonas de movementos de peóns.
