Alertan de festas ilegais de Nadal que poden ser "bombas de reloxería" polos locais onde se celebrarán

A Federación de Empresarios de Salas de Festa, Baile e Discotecas de Galicia (Fesdiga) calcula unha redución do 50% das festas ilegais que levarán a cabo este Nadal en Galicia, en comparación co ano pasado.

Así o trasladaron nunha rolda de prensa realizada este mércores en Vigo, onde aseguraron que se celebrarán unhas 450 festas ilegais en Galicia nas noites de Fin de Ano e Reis. Deste total, 150 serán na provincia de Pontevedra e outras tantas na Coruña, mentres que unhas 75 en Ourense e en Lugo, respectivamente.

Segundo a asociación, as razóns desta redución son a caída da "euforia" existente despois da pandemia, a campaña realizada contra estes encontros co apoio dos medios de comunicación e a situación que está a atravesar o sector no medio da crise económica.

ONDE SE CELEBRAN?

A federación indicou que a maioría das festas ilegais (85%) ocorren en establecementos que non tramitan a preceptiva autorización municipal para poder desenvolver unha festa extraordinaria (actividade non permitida na súa licenza e que esixe uns requisitos técnicos e de seguridade extraordinarios e adicionais).

O outro 15% trátanse de "bombas de reloxaría", ao ser festas en locais sen licenza e sen acondicionar, que non cumpren cos requisitos técnicos e de seguridade esixidos pola normativa (casas privadas, garaxes, naves e locais sen acondicionar, etc.).

"Esiximos que os concellos cumpran co seu deber, realizando un labor de investigación, que permita detectar e impedir que leven a cabo todas aquelas festas que son ilegais e representan un grave perigo para os participantes", subliñaron, segundo recollen nun comunicado.

SITUACIÓN

Sobre a "delicada" situación do sector, o presidente de Fesdiga, Samuel Pousada, dixo que tras o Covid-19 agora está a soportar unha crise económica con subidas de IPC e dos tipos de interese, que afasta a investidores.

Con todo, puxo en valor datos positivos, como a lixeira recuperación de locais que pecharan en anos anteriores ou o cambio dalgunhas normativas. Respecto diso, dixo que o anteproxecto da lei de protección da saúde dos menores que elabora a Xunta está a ser consensuada co sector.