Con 463 motoristas mortos na estrada en 2023, a DGT obrigaraos a usar casco integral ou modular e luvas homologadas
Establecerá un curso obrigatorio para os condutores do permiso B con 3 anos de antigüidade que queiran conducir motos de ata 125 cc.
Por Europa Press / Redacción | MADRID | 04/01/2024 | Actualizada ás 13:51
A Dirección Xeral de Tráfico (DGT) obrigará en 2024 aos motoristas a utilizar un casco integral ou modular e unhas luvas homologadas cando circulen por estrada. Así o anunciou este xoves o ministro do Interior, Fernando Grande-Marlaska, durante a presentación do balance de sinistralidade viaria do ano 2023 na sede da Dirección Xeral de Tráfico, na que puxo o foco nas mortes de motoristas, que aumentaron un 10 % con respecto ao ano 2022.
En concreto, en 2023 faleceron un total de 463 motoristas nas estradas españolas, a cifra máis alta rexistrada desde o ano 2014. Para reducir estas cifras de sinistralidade, a DGT establecerá un curso obrigatorio para os condutores do permiso B con tres anos de antigüidade que queiran conducir motos de ata 125 centímetros cúbicos.
Así mesmo, actualizará o contido dos cursos de recuperación de puntos para incorporar un perfil específico para os motoristas que perderon o seu saldo de puntos e para os que se programarán cursos de condución segura e eficiente. O 2023 finalizou con 1.145 falecidos nas estradas españolas, o que supón a mesma cifra de mortos en sinistros de tráfico que en 2022. Así, o ano pasado producíronse 1.048 sinistros mortais nas estradas españolas, nos que faleceron 1.145 persoas e outras 4.495 resultaron feridas graves.
