Máis microplásticos poderían chegar á costa galega durante a fin de semana, segundo Meteogalicia
Hai cambio de tempo coa chegada dos restos dunha borrasca.
Por Europa Press / Redacción | SANTIAGO DE COMPOSTELA | 12/01/2024 | Actualizada ás 13:39
As condicións meteorolóxicas para a chegada de pélets e outros residuos ao litoral galego serán "propicias" a partir da tarde do sábado e, especialmente, o domingo. Así o explicou en declaracións a Europa Press o coordinador de Meteogalicia, Juan Taboada, que detallou que as predicións apuntan a que as condicións serán "propicias", o que non asegura "que vaia a chegar moitísimo", posto que "polo momento tampouco se sabe se hai moito material flotando ou pouco".
"As condicións son propicias, pero de aí non se pode deducir que vaia a chegar moito, porque non sabemos canto de disperso estará", aclarou. Máis en detalle, o meteorólogo sinalou que este venres Galicia atópase aínda baixo a influencia do anticiclón, que fai que o vento "vaia de terra cara ao mar", polo que "en principio debería dificultar a chegada destes pélets ao litoral".
CAMBIO DE VENTOS
Con todo, o sábado está prevista a chegada "dos restos da borrasca Hipólito", que aínda que chegaría "bastante debilitada", vai ser "suficiente para que cambien os ventos". Así, Meteogalicia estima que o sábado pola tarde o vento tome un compoñente "máis sur" e xa o domingo "suroeste", que é "o vento típico desta época do ano en Galicia".
Con este vento, a situación meteorolóxica e de correntes do océano "é máis propicia" para que, se hai pélets flotando, "puidesen achegarse ao litoral".
VENTOS DE FORZA 7
Sobre a forza do mar e a posibilidade de que as ondas rompan os sacos de pélets, Juan Taboada sinalou que os ventos de forza 7 que se esperan "si poden axudar", pero "é complicado de calcular". "Si que podemos dicir que o sábado pola mañá e un pouco pola tarde o mar vai estar bastante alterado", afirmou.
Meteogalicia actualiza as súas previsións para o propio día e os tres días seguintes. Por iso, con detalle, agora mesmo poden concretar as predicións para o venres, sábado, domingo e luns, aínda que Taboada indicou que "dunha maneira máis cualitativa" pódese apuntar a que o martes "vai seguir soprando vento de suroeste".
