Por Europa Press / Redacción | SANTIAGO DE COMPOSTELA | 17/01/2024 | Actualizada ás 19:08
O sindicato CIG instou aos veciños das Pontes a "seguir mobilizándose" para "esixir garantías de reindustrialización e emprego", alegando que, "transcorridos meses da folga" convocada pola CIG, "seguen sen atenderse as reivindicacións" neste ámbito. En concreto, está convocada unha concentración para o próximo 23 de xaneiro, ás 20,00 horas, na Praza do Carme.
En concreto, o sindicato criticou que a Xunta non convocase aínda a Mesa de Impulso Económico das Pontes, "na que se teñen que ir concretando os proxectos futuros". "Non existen tampouco garantías de continuidade no emprego para o persoal da industria auxiliar e, de feito, hai persoal que nin se sequera foi incorporado aos traballos de pre-desmantelamento da central térmica, a pesar do manifestado por Endesa", afirman.
Para a CIG, a demanda de manter a vinculación laboral dos traballadores das auxiliares é "un obxectivo irrenunciable", polo que tanto Endesa como as administracións "teñen o deber de asegurar esta reivindicación ata que se consiga a súa inserción nos proxectos industriais futuros".
Nestes dous meses, engade a CIG, "tampouco se avanzou nada na elaboración dun plan de choque que a curto praza dea unha alternativa laboral e económica a todos os colectivos laborais afectados, como xa se fixo con anterioridade ao peche da mina". Este plan "é unha prioridade e debe contar con financiamento da administración autonómica e estatal e con participación sindical na súa xestión", recollen.
De igual maneira, denuncian "non se deron pasos para a creación de chan industrial no municipio para posibilitar o asentamento de novos proxectos". "É Endesa a que está a facer negocio vendendo chan industrial mentres desde o propio Goberno local négase a posibilidade de debater sobre o futuro das instalacións que agora ocupa a eléctrica", apostilan.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.