Traballadores da UCI de Ourense: "Non imos tolerar que se nos tache de 'alarmistas' nin de 'oportunismo electoral'"

Unha xornada máis continuou o cruzamento de acusacións entre as enfermeiras e TCAES da UCI de Ourense, que critican a distribución de espazos de coidados intensivos, e a xerencia da área sanitaria, que defende os criterios de calidade cos que foi deseñada.

En concreto, este venres, os traballadores emitiron un comunicado no que critican que a xerencia lles tache de "alarmistas" e volveron a reclamar unha reunión cos responsables e unha "reestruturación" do persoal. A área, pola súa banda, asegurou que "se cumpren os requirimentos máis esixentes", aínda que dixo que están "dispostos a abordar unha aproximación conxunta".

Ante as críticas dos pasados días, o persoal da UCI de Ourense asegurou que, ao contrario que o indicado pola área sanitaria, "en ningún momento" a xerencia consultou "a ningún profesional que traballe a pé de cama" dos espazos habilitados e dixeron que "non van tolerar acusacións tan graves como pór en cuestión que isto se deba a un 'oportunismo electoral'".

"Non permitimos que se nos tache de alarmistas, cando nós contamos a realidade do que vivimos día a día", recolle o comunicado, no que apuntan que "en ningún momento" fíxose "mención á redución de persoal", se non que o que reclaman é "unha reestruturación" dos efectivos.

OS REQUIRIMENTOS "MÁIS ESIXENTES"

Como resposta, fontes da área sanitaria volveron a reiterar "a seguridade e a calidade asistencial da UCI" do CHUO, que foi "posto en dúbida en diversos comunicados", e apostaron por "tratar internamente un tema estritamente laboral". Neste sentido, a área sanitaria apuntou que "a dotación de persoal" nesta área "cumpre os requirimentos máis esixentes", aínda que fixo " pública" a súa "disposición a escoitar para abordar unha aproximación conxunta e construtiva".

CHUO | Fonte: Arquivo