Máis de 7.500 persoas aproban a oposición de técnico auxiliar de enfermaría, que conta con 789 prazas

Un total de 7.553 persoas, o 90% dos presentados, superou a fase de oposición do proceso selectivo na categoría de técnico en coidados auxiliares de enfermaría (TCAE), que conta con 789 prazas. O Sergas publicou as puntuacións provisionais da fase oposición. Pola súa banda, superaron a proba 3.708 aspirantes (o 77%) na categoría de persoal de servizos xerais (PXS), onde se ofertan 196 prazas.

Os exames celebráronse o pasado novembro. Á categoría de TCAE presentáronse 8.379 persoas e á de PSX concorreron un total de 4.783. Agora ábrense cinco días hábiles a partir deste venres, 26 de xaneiro, para presentar reclamacións. Posteriormente, publicarase no Diario Oficial de Galicia a puntuación definitiva. Da avaliación de méritos dependerá a adxudicación das prazas.

Por outra banda, o Sergas publicou a relación definitiva de admitidos e a baremación provisional no proceso de estabilización por concurso de méritos de diversas categorías de persoal estatutario. Aquí, resultaron admitidas 2.050 persoas en varias categorías de sanitario non facultativo e persoal de xestión de servizos para un total de 284 prazas.

Paralelamente, o DOG publica este xoves o acordo da mesa sectorial sobre a futura relación estatuaria da persoa con contratos Río Hortega e Juan Rodés e o seu encadre extraordinario na carreira profesional. O acordo foi asinado polo Sergas con todos os sindicatos da mesa sectorial.

Miles de aspirantes vestíronse de negro como protesta mentres realizan as oposicións de Enfermaría do Sergas / Europa Press - Arquivo / Europa Press