Un xulgado aproba a cesión provisional á Escola Naval de Marín dun camión comisado nunha operación antidroga
A maxistrada indica que dadas as súas características e estado de conservación, resulta "idóneo para a prestación dun servizo público".
Por Europa Press / Redacción | SANTIAGO DE COMPOSTELA | 30/01/2024 | Actualizada ás 14:58
O Xulgado de Primeira Instancia e Instrución número 4 de Cambados acordou o comiso cautelar e utilización provisional, por parte da Escola Naval Militar de Marín, dun camión guindastre pertencente a un investigado por un delito contra a saúde pública, cuxo comiso por parte da Garda Civil foi autorizado polo órgano xudicial o pasado mes de novembro.
No auto, a xuíza explica que hai indicios de que o vehículo era "un instrumento da actividade ilícita de produción, fabricación e traslado de embarcacións de alta velocidade" que o investigado presuntamente dirixía e desempeñaba nas dúas estancias da nave do Couto de Abaixo-Castrelos, xunto a outros dos investigados na causa.
A maxistrada indica que o camión guindastre, dadas as súas características e estado de conservación, resulta "idóneo para a prestación dun servizo público no seo dunha institución da administración pública como é a Escola Naval Militar de Marín", quen cursou a solicitude para a súa utilización provisional ao xulgado.
A Oficina de Recuperación e Xestión de Activos (ORGA), que é a quen corresponde resolver sobre a adxudicación concreta de uso e medidas de conservación deste tipo de bens, xa informou ao xulgado que está conforme coa decisión, que foi adoptada "para garantir a efectividade do comiso dos efectos e vehículos referidos, aprehendidos e postos a disposición xudicial desde as primeiras dilixencias".
