Xulgan a unha banda que traía a persoas nixerianas para obrigalas a exercer a prostitución e a mendicidade
O Ministerio Público pide para os acusados penas que van dos 13 aos seis anos de cárcere.
Por Europa Press / Redacción | SANTIAGO DE COMPOSTELA | 02/03/2024 | Actualizada ás 13:00
A sección sexta da Audiencia Provincial da Coruña, con sede en Santiago, xulgará ao longo da próxima semana a sete persoas de orixe nixeriana acusadas de integrar unha banda criminal que traía a compatriotas ilegalmente a Galicia e obrigáballes a exercer a prostitución e a mendicidade para saldar unha suposta débeda.
Os acusados, con diferentes conexións familiares e de amizade, desenvolveron "de forma sostida ao longo do tempo" e con ánimo de lucro actividades dedicadas a fomentar a inmigración irregular de persoas oriúndas de Nixeria, ás que proporcionaban documentación falsa, aloxamento, comida e transporte. Posteriormente, inducíanas a exercer a prostitución ou a mendicidade para que abonasen a suposta débeda que contraeran con eles, baixo ameaza de facer dano aos seus familiares en Nixeria.
Entre as vítimas está unha testemuña protexida que chegou a Europa en 2016 nunha balsa e, posteriormente, foi trasladada a España por terra en compañía dun dos acusados. Unha vez en Madrid, o grupo deulle aloxamento e trasladoulle que contraera con eles unha débeda de 25.000 euros, informándolle de que "a única saída era dedicarse á prostitución".
Para conseguir o seu propósito, os procesados informáronlle de que sabían que en Nixeria deixara á súa avoa, elemento que utilizaron reiteradamente para infudirle medo. A muller exerceu a prostitución na capital española e, en xullo de 2017, foi trasladada á Coruña e, posteriormente, a Santiago, onde exerceu a prostitución en dous clubs.
Durante os rexistros derivados da denuncia interposta pola testemuña protexida, os axentes localizaron nas vivendas dos procesados a dous cidadáns nixerianos en situación irregular, que apuntaron que contraeran cos acusados unha débeda económica, "nunha situación idónea para que, a continuación, os encamiñasen a desenvolver actividades" ilícitas.
O Ministerio Público considera estes feitos constitutivos dun delito contra os dereitos dos cidadáns estranxeiros, un delito de trata de seres humanos, un delito de prostitución e explotación sexual, un delito de integración en grupo criminal, outro de estafa e outro de falsificación de documento público. Pide para as acusados penas que van dos 13 aos seis anos de cárcere.
