"Facendo empresa" distingue aos negocios galegos nos que os socios son traballadores

"Facendo Empresa" é unha nova marca colectiva galega que se lanza co obxectivo de facilitarlle aos consumidores a identificación dun tipo de empresas, de sectores moi diversos, mais cuns valores comúns que están en alza: as sociedades laborais.


A marca, propiedade de AESGAL (Agrupación Empresarial de Sociedades Laborais de Galicia), conta co financiamento da Xunta de Galicia e do Fondo Social Europeo.

As sociedades laborais son parte da chamada economía social xunto coas cooperativas, centros especiais de emprego ou empresas de inserción. Curiosamente, pese a estar preto de alcanzar os 30 anos de vida, as súas peculiaridades son descoñecidas para gran parte da sociedade.

Segunto esta patronal, son máis de seiscentas empresas en Galicia e milleiros a nivel de toda España. Dado que os socios son traballaroes, este tipo de compañías tenden a xerar emprego estable.

Obxectivos da marca
O obxectivo fundamental da nova marca, Facendo Empresa, é que as sociedades laborais galegas teñan unha ferramenta para explicarse a sí mesmas ante os seus clientes, provedores e sociedade en xeral. Tamén pretende facilitar a elección das sociedades laborais por parte das persoas que optan por un consumo responsable e, cando é posible, polo comercio local.

Ademais, AESGAL explica que ven fomentando a creación de equipos de traballo de distintas sociedades laborais na contorna da cultura, as artes gráficas ou as asesorías. O colectivo de cultura xa está a funcionar de forma estable baixo a denominación de Brain Galicia.

Para facilitar este tipo de sinerxias vaise realizar unha primeira Xornada de networking e speedmeetings o vindeiro martes 29 de setembro no Hotel Ruta Jacobea, nas proximidades de Santiago de Compostela.