Concerto presentación do novo disco de Xoel López
Paramales é o título do decimo terceiro álbum na carreira do artista, un paso máis cara ao son contemporáneo característico do artista galego que rescata a súa etapa mod e o seu gusto polo soul.
Por GC Tendencias | Vigo | 16/09/2015 | Actualizada ás 21:00
A Fundación Galicia Obra Social (Afundación) pon á venda desde hoxe as entradas para o concerto presentación de Paramales, o novo álbum de Xoel López, que terá lugar o sábado 12 de decembro ás 21.00 h no Teatro Afundación de Vigo. Composto por trece cancións gravadas nos Estudios Reno de Madrid, Paramales é un paso máis cara ao son contemporáneo característico do artista galego que rescata a súa etapa mod e o seu gusto polo soul e combínaos coas súas xa habituais guitarras españolas e atrevidos xogos de riffs.
No seu directo acompañarano seis músicos, entre os que se atopan Miguel Rivera (Meiga), Charlie Bautista (Russian Red, Christina Rosenvinge) ou Iván González-Chapo (M Clan, Amaral). As entradas pódense adquirir a través das canles habituais de venda de Afundación, en Ataquilla.com.
Xoel López
Nado na Coruña en 1977, é considerado un dos artistas máis representativos e influentes da nova canción española. Publicou un total de trece álbums na súa carreira como músico, dos cales Paramales é o segundo en solitario, e ten actuado en diferentes escenarios do panorama español así como en San Francisco, Nova York, Colombia, O Uruguai e Venezuela, entre moitos outros.
