O festival Titiriberia de Rianxo comeza este luns cunha trintena de funcións e a estrea de dez obras novas
Celebrarase desde o 12 ata o 18 de agosto.
Por Europa Press / Redacción | SANTIAGO DE COMPOSTELA | 07/08/2024 | Actualizada ás 12:24
A novena edición do festival de monicreques tradicionais 'Titiriberia' levará ao municipio coruñés de Rianxo unha trintena de funcións desde o 12 ata o 18 de agosto. Ademais, o certame contará cun total de dez estreas, que completarán a "ampla programación" deste ano. Deste xeito, compañías como Trécola, Seisdedos Marionetas, Airiños, A Cova das letras ou Monicreques Alakrán estrearán os seus novos espectáculos durante esta novena edición, que tamén renovará dous formatos "que xa son unha tradición": 'As varietés de Barriga Verde' e 'A festa dos monicreques', que abrirá a sesión inaugural ás 13.00 horas.
Segundo destacou nun comunicado a asociación Morreu o Demo, organizadora do evento, o 'Titiriberia: Festival de monicreques tradicionais' celebrarase un ano máis "grazas á colaboración e ao patrocinio do Concello de Rianxo, da Xunta a través da Axencia Galega das Industrias Culturais e da Deputación da Coruña".
PROGRAMACIÓN
O luns 12 de agosto celebrarase a estrea desta novena edición da man da compañía vasca Ostomila Monicreques, que en coprodución con Titiriberia trae ao galego a súa peza 'Baleazaleak', "que repasa a epopea dos baleeiros vascos en Terranova e a súa conexión coas comunidades mikmaq".
Outra estrea deste ano tamén virará ao redor das baleas, xa que Os Quinquilláns e Vai de Roda levarán a escena o conto de Rafael Dieste 'De como chegou a Rianxo unha tirotea', un espectáculo itinerante que se poderá ver o vindeiro mércores e que terá como punto de partida o Campo de Arriba de Rianxo.
Así mesmo, este lugar acollerá a 'Feira Vella', un espazo no que recrearán unha feira tradicional ao combinar xogos, entretementos clásicos e espectáculos. Deste xeito, Teatro Airiños presentará 'Os casos da Feira Vella' o martes 13, mentres que o xoves 15 será a quenda de Seisdedos coa obra 'Peito de lobo', baseada no personaxe inmortalizado por Castelao en 'Cousas'. A cova das letras será outra das compañías que pasarán por este escenario, farao o venres e o sábado.
Nesta liña, a Praia de Tanxil tamén acollerá a estrea dunha obra nesta edición do Titiriberia, a compañía Trécola presentará o mércores 14 ás 13.00 horas 'As aventuras de Pituquito'. Por outra banda, Seisdedos escollerá a Praza Castelao como punto de partida para a súa nova montaxe, 'Cantar do ano de Rianxo', coa que recreará o mércores ás 20.30 horas "un cantar de cego que narra unha selección de feitos destacados da actualidade rianxeira desde a última edición do festival".
A todas estas montaxes, coproducidos polo propio festival, hai que sumar 'As varietés de Barriga Verde', unha produción propia de Titiriberia que "pretende revivir, desde unha óptica actual, o espectáculo que a familia Silvent realizaba na súa barraca antes do número de marionetas".
