A CIG ve como "única novidade" do curso escolar "o reforzo propagandístico" da Xunta
Nunha rolda de prensa ofrecida este xoves, o secretario nacional de CIG-Ensino, Suso Bermello, considera que a Xunta segue polo "camiño das vellas políticas" de "incompetencia"
Por Europa Press / Redacción | SANTIAGO DE COMPOSTELA | 05/09/2024 | Actualizada ás 18:07
A CIG-Ensino nega que os centros escolares vaian sufrir este curso unha "modernización", senón que "a única novidade" que haberá co arranque do curso 2024/25 é "o reforzo propagandístico" por parte da Consellería de Educación, Ciencia, Universidades e FP.
Nunha rolda de prensa ofrecida este xoves, o secretario nacional de CIG-Ensino, Suso Bermello, considera que a Xunta segue polo "camiño das vellas políticas" de "incompetencia", de "ineficacia" e de "parches" para "tapar todas as vergoñas".
As principais críticas dirixiunas cara ao acordo asinado en outubro de 2023 entre a Consellería e os sindicatos CCOO, ANPE e UGT, que non contou coa ratificación da central nacionalista, a maioritaria entre os docentes da educación pública.
Este acordo reduce o máximo de alumnos por clase de 25 a 20, pero este curso só empezarase a aplicar en 4º de Infantil (3 anos) e ano a ano irase estendendo. Iso si, o texto contempla un conxelamento de agrupamentos para os cursos nos que aínda non se aplique este cociente.
Con todo, o secretario nacional de CIG-Ensino denuncia que "o único que se está cumprindo" de forma íntegra do texto asinado polo resto de organizacións é a redución do cociente en 4º de Infantil, que aínda así é "unha simple acomodación natural ao declive demográfico e a caída da matrícula".
Neste sentido, Bermello quéixase da insuficiencia do acordo, porque a súa progresividade implica que os nenos que actualmente están en 5º de Infantil (4 anos) en unidades de 20 a 25 estarán "13 anos" sen que se reduza este cociente.
Ademais, sobre o cómputo dobre e triplo dos alumnos con discapacidade e trastornos de conduta, a CIG quéixase de que "non se ten en conta" a alumnos con "algún tipo de necesidade educativa específica", aínda que estean diagnosticados.
"MENTIRAS" COS 400 DOCENTES DE APOIO
Tamén lamentou Bermello as "mentiras" da Consellería respecto diso da incorporación de 400 profesores de apoio anunciado o luns: a metade correspóndense ao novo plan 'Promociona' e estarán nas aulas dede o primeiro día, mentres que a outra metade son os do plan 'PROA+' que chegarán en outubro.
O sindicato maioritario censura que a Xunta "simplemente" quere dotar a estes profesores por centros e "non por aulas" onde estean os alumnos con necesidades. De feito, lembrou que 'PROA+' non é un programa autonómico, senón que se financia con fondos estatais e europeos, e que os docentes incorporados ao amparo deste plan "o ano pasado eran máis".
Así mesmo, o acordo de outubro de 2023 contempla unha redución do horario lectivo en Infantil e Primaria, de 25 a 23 horas á semana, o que implica que a Xunta "se nega a recuperar" o que había antes de "os recortes" aplicados por Alberto Núñez Feijóo en 2011, cando subiron de 21 a 25 nestes niveis.
"NINGUNHA MODERNIZACIÓN"
En conclusión, Suso Bermello cre que o Plan de Mellora Educativa (Plan Mega) anunciado o luns non implica "ningunha modernización". "O único que se modernizou foi o gabinete de comunicación do conselleiro", ironizou.
A CIG tamén se queixa de que non haxa "ningunha medida efectiva para reducir a carga burocrática" nos centros e de que as prexubilacións que se acordaron para os profesores do ensino concertado "non se contempla" para o persoal da pública.
A maiores, Bermello volveu a esixir á Xunta que publique unha listaxe coas prazas estruturais de todos os centros para coñecer se están cubertas, tendo en conta que "hai profesorado que hoxe mesmo sabe que está a ser suprimido".
