O TSXG aumenta a condena a dous dos tres acusados de traficar con haxix na A-8 ao consideralos "coautores" e non "cómplices"
Imponlles, a cada un, tres anos de cárcere (en lugar dun ano e oito meses) e o pago dunha multa de 300.000 euros.
Por Europa Press / Redacción | VIGO | 26/09/2024 | Actualizada ás 16:39
A Sala do Civil e Penal do Tribunal Superior de Xustiza de Galicia (TSXG) aumentou a condena imposta pola sección segunda da Audiencia Provincial de Pontevedra a dous dos tres acusados de traficar con haxix ao consideralos "coautores" e non "cómplices". En concreto, o Alto tribunal galego estimou o recurso presentado polo Ministerio Fiscal relativo á sentenza da Audiencia do pasado 1 de febreiro de 2024, na que se condenou a tres acusados por traficar con haxix.
Así, o TSXG revogou o fallo de forma parcial, no sentido de cualificar a actuación de dous dos acusados como de coautoría, e non de mera complicidade, impóndolles, a cada un, tres anos de cárcere (en lugar dun ano e oito meses) e o pago dunha multa de 300.000 euros. Ademais, o tribunal confirmou a pena de tres anos e medio de cárcere imposta á persoa que foi sorprendida coa droga na autovía do Cantábrico.
Os feitos ocorreron en 2018, cando un dos condenados citouse con outro home, xa falecido, nunha área de servizo da A-8 para transferir droga, que sería destinada ao mercado ilícito. Cada un deles foi acompañado por unha persoa no coche, tamén condenados. En concreto, a sentenza recolle máis de 350 tabletas de haxix, valoradas en case 200.000 euros.
