Máis protestas no Hospital de Vigo ante o colapso das urxencias
Sete horas de espera en urxencias, goteiras nas consultas externas e traslados de doentes ao antigo Meixoeiro. Ante este panorama no Álvaro Cunqueiro, os traballadores retoman as mobilizacións.
Por Galicia Confidencial | Vigo | 09/01/2016 | Actualizada ás 08:00
"Sete horas nas urxencias do Cunqueiro para tres probas, e seguimos". Esta é unha das recentes e numerosas protestas dun doente atendido nas urxencias do Hospital de Vigo.
@Farodevigo @AtlanticoDiario @lavozdegalicia 7 horas nas urxencias do Cunqueiro para 3 probas simples, e seguimos.. pic.twitter.com/hnSSHw8kNn
— Julio Oitavén (@oitaven) January 8, 2016
A Xunta de Persoal do Hospital Álvaro Cunqueiro (HAC) convocou un calendario de mobilizacións para denunciar a falta de recursos. Segundo os traballadores, as urxencias están a sufrir un verdadeiro colapso.
A Federación de Sanidad de CC.OO. en Vigo informa que a primeira protesta será unha concentración o 13 de xaneiro as 11 horas na zona de consultas externas do HAC. Precisamente nesa zona estanse a rexistrar goteiras, situación que pode empeorar ante o temporal que baterá en Galicia esta fin de semana.
Os sindicatos denuncian que o colapso é tal que algúns dos doentes que acuden a urxencias e teñen que ser hospitalizados son trasladados a outro hospital, o Meixoiro. Dáse a circunstancia que as urxencias do Meixoeiro pecháronse para centralizalas no Cunqueiro.
Isto evidencia que os profesionais tiñan razón cando alertaron que fusionando no novo centro as urxencias do Meixoeiro e do Central non era dabondo. Ademais, dáse a circunstancia que no Meixoeiro hai camas pechadas, polo que as infraestructuras sanitarias de Vigo están en realidade infrautilizadas.
Na opinión da Xunta de Persoal, o recente reforzo do cadro de persoal con profesionais eventuais e precarios non están evitando que os profesionais estean a soportar "unhas cargas de traballo inabordábeis". Os profesionais acusan ao responsábeis do SERGAS e da Xunta de "desprestixiar a sanidade pública".
Ademais de problemas de medios e infraestructuras, o Cunqueiro sofre tamén problemas organizativos. Por exemplo, a barreira do aparcamento dos traballadores non se levanta durante o período de cambio de turno, o que provoca longas colas para entrar ou saír do HAC.
