Detido nun bus de Ourense tras ser recoñecido pola vítima dun roubo con forza

Axentes da Policía Nacional da Comisaría de Ourense detiveron a un home como suposto autor dun delito de roubo con forza nun domicilio, e que foi recoñecido pola vítima dese roubo cando viaxaba nun bus.

Segundo informaron fontes policiais, a detención produciuse o pasado 3 de maio, cando un viandante requiriu aos axentes na vía pública. Esta persoa indicou aos funcionarios que vira no interior do bus que pasaba nese momento pola rúa, á altura de onde se atopaban, ao suposto autor dun roubo con forza que el mesmo sufrira no seu domicilio.

Os axentes accederon nese momento ao bus e procederon á identificación e detención do sospeitoso. O detido, unha vez practicadas as dilixencias, foi posto a disposición do xulgado.