Intervención da Garda Civil nun enfrontamento na poxa dixital de gando de Silleda
A resistencia ante este cambio dalgúns compradores, que se negaron a poxar este martes, provocou que durante a xornada moitos animais quedasen sen adxudicar
Por E.P. | SANTIAGO DE COMPOSTELA | 06/05/2025 | Actualizada ás 19:38
Un enfrontamento entre os compradores da recría, que se negaron a utilizar a nova aplicación móbil para poxar polos animais, e os transportistas, que bloquearon a saída do recinto feiral, terminou coa intervención da Garda Civil en Silleda.
Tal e como trasladou a Central Agropecuaria de Galicia Abanca nun comunicado, este martes celebrouse a primeira poxa totalmente dixitalizada, despois de que no ano 2021 se puxese en marcha unha aplicación móbil de uso voluntario para pagar desde o teléfono.
No entanto, a resistencia ante este cambio dalgúns compradores, que se negaron a poxar este martes, provocou que durante a xornada moitos animais quedasen sen adxudicar, obrigando aos transportistas a levalos de novo aos seus respectivos donos.
Un labor que, desde a entidade admiten que "non é habitual e prexudícalles", o que causou que algúns deles bloqueasen a saída do recinto cos seus camións. Este feito requiriu da intervención da Garda Civil, que desbloqueou o acceso e permitiu que os animais fosen retirados "sen dificultade".
