A nova edición de 'No Bico un Cantar' contará con 500 escolares, dedicada este ano a Castelao

A nova edición de 'No bico un cantar', actividade organizada polo Consello da Cultura Galega (CCG) coa colaboración da Xunta de Galicia para divulgar a tradición literaria galega entre os máis novos, terá como protagonista este ano o 75º aniversario do falecemento de Afonso Daniel Rodríguez Castelao.

Así, 500 nenos de toda Galicia -- coa colaboración especial este ano do Instituto Arxentino Galego Santiago Apóstolo de Bos Aires --, participarán neste encontro, que terá lugar na praza de Rafael Dieste de Rianxo o próximo 6 de xuño ás 18.00 horas.

Na presentación participou o director xeral de Cultura, Anxo M. Lorenzo; a presidenta do CCG, Rosario Álvarez; e o alcalde de Rianxo, Julián Bustelo.

"Como non podía ser doutra maneira, este ano había que centrar este encontro nas palabras e na terra de Castelao, unha gran oportunidade para achegar a figura do intelectual aos máis novos", apuntou Lorenzo.

Para o representante autonómico, trátase dunha vía de divulgación da cultura galega con "moi boa acollida entre os máis pequenos, que poden compartir a súa paixón pola música con outros estudantes" nesta xornada de convivencia e profundar, ao mesmo tempo, na creación literaria.

Ademais, fixo fincapé na participación, xunto aos conservatorios profesionais de música, as escolas municipais e coros infantís, do Instituto Arxentino Galego Santiago Apóstolo de Buenos Aires, "unindo desta maneira tan especial os dous mundos de Castelao, o seu pobo natal e o lugar onde pasou os seus últimos anos".

A responsable do CCG recoñeceu que esta é unha das actividades "máis emocionantes" do calendario do Consello.

PROFESIONAIS PARTICIPANTES

Maximino Zumalave volverá porse á fronte deste concerto, que contará coa participación da agrupación de metais Hércules Brass, conformada por Alejandro Vázquez (trompeta), Víctor Manuel Vilariño (trompeta), Javier González (trompa), Iago Ríos (trombón) e Rodrigo Rodríguez (tuba), que se converte nesta ocasión nun sexteto coa participación de Pablo Fernández Guzmán (trompa convidado).

No recital participarán alumnos dos conservatorios profesionais de música (CMUS) dependentes da Consellería de Educación: CMUS da Coruña, CMUS Xan Viaño de Ferrol, CMUS Xoán Montes de Lugo, CMUS de Ourense, CMUS Manuel Quiroga de Pontevedra, CMUS de Santiago de Compostela, CMUS de Vigo, CMUS Felipe Paz Carbajal de Noia, CMUS Profesional de Ribeira Enrique Paisal e o alumnado da escola municipal de Porto do Son, Carnota, Santiago de Compostela, a EMUSPR de Rianxo, o Coro Infantil da OSG, e o Coro da Escolanía da Catedral de Santiago de Compostela.

Este ano, como novidade, participa tamén o Instituto Arxentino Galego Santiago Apóstolo de Buenos Aires. Un ano máis, a escritora Rosa Aneiros guiará o acto.

O PROGRAMA

Tal e como recollen nun comunicado, o repertorio homenaxea a figura de Castelao cun programa moi coñecido e popular que fala de literatura, música, do mar e da emigración.

Arrinca con 'Galliard Battaglia', unha peza barroca para instrumentos de vento, representativa da música alemá temperá pola tradición renacentista. A primeira canción é 'Bicos do mar', con letra de Xesús Frieiro Dourado e música de Anxo Romeu. Séguenlle 'Lela' e 'A Rianxeira' e, tras unha fanfarria, terá lugar a canción que se estrea nesta edición, 'Daniel', con música composta por José Luís do Pico Orjais sobre un poema de Emilio Pita -- colaborador de Castelao --.

O concerto finalizará con 'Maio longo' de Rosalía de Castro. Todos os arranxos musicais do programa son do compositor Juan Durán.

Imaxe de Castelao no 1935 | Fonte: RAG