Galicia aproxímase á media española en médicos por cada mil habitantes, pero está á cola en enfermeiros

O número de profesionais sanitarios colexiados en España superou por primeira vez o millón de persoas en 2024, ao situarse en 1.008.764, un 2,6 % máis que no ano anterior (975.243); sendo os colectivos maioritarios enfermeiros con 353.635 (35,1  % do total), médicos con 310.558 profesionais (30,8 %) e farmacéuticos con 81.064 (8,0 %).

Segundo datos do Instituto Nacional de Estatística (INE) publicado este xoves, por cada mil habitantes practicamente mantense o número destes profesionais, sendo no caso dos enfermeiros de 7,21 (7,12 en 2023) e 6,33 no caso dos médicos (fronte a 6,21). No caso de Galicia, está á cola en enfermeiros (cunha taxa de 5,24) e, aínda que segue por baixo da media estatal, aproxímase á mesma no que respecta aos médicos (6,03).

As taxas máis elevadas de médicos déronse en Aragón (7,46 por cada 1.000 habitantes), Asturias (7,43) e Madrid (7,33). Séguenlle País Vasco (7,25), Cantabria (7,17), Navarra (7,13), Castela e León (7,09), Cataluña (6,35), Estremadura (6,24), A Rioxa (6,15), Canarias (6,07), Galicia (6,03), Comunidade valenciana (5,82), Murcia (5,74), Baleares (5,71) e Andalucía (5,68). as máis baixas nas cidades autónomas de Melilla (3,72) e Ceuta (4,53), e en Castela-A Mancha (4,94).

Pola súa banda, as taxas máis elevadas de enfermeiros colexiados por cada 1.000 habitantes rexistráronse en Cantabria (9,32), Navarra (8,92) e País Vasco (8,76); séguenlle Estremadura (8,58), Asturias 8.24), Canarias (8,12), Madrid (8,08), Castela e León (7,96), Ceuta (7,84), Cataluña (7,78), Aragón (7,4), Melilla (7,24), A Rioxa (6,51), Comunidade Valenciana (6,42), Andalucía (6,39) e Castela-A Mancha (6,36); e as menores en Murcia (4,99), Galicia (5,24) e Baleares (6,14).

No resto de especialidades: o colectivo de farmacéuticos presentou en 2024 a taxa por 1.000 habitantes de 1,65. No caso dos enfermeiros con especialidade de matrona, a taxa foi de 0,98 profesionais por cada 1.000 mulleres en idade fértil. Ademais no caso dos fisioterapeutas a taxa foi de 1,46, séguenlle Psicólogos (0,89), Dentistas (0,87), Ópticos-Optometristas (0,40), Logopedas (0,25), Terapeutas ocupacionais (0,19), Dietistas Nutricionistas (0,19) e Protésicos dentais (0,15).

POR IDADE E SEXO

Atendendo á distribución por grupos de idade, as maiores porcentaxes de profesionais sanitarios menores de 45 anos atopáronse en terapeutas ocupacionais (86,6 %), dietistas nutricionistas (83,2 %) e fisioterapeutas (74,6 %). As menores porcentaxes neste grupo de idade presentárono os colectivos de protésicos dentais (38,8 %), farmacéuticos (39,4 %) e biólogos (39,6 %). Pola súa banda, as maiores porcentaxes de colexiados de 65 e máis anos déronse en médicos (27,0 %) e farmacéuticos (18,6 %). No resto das profesións que recolle a estatística os maiores incrementos déronse en físicos con especialidade sanitaria (13,0 %), terapeutas ocupacionais (10,3 %) e psicólogos con especialidade sanitaria (7,9 %). Mentres baixaron os Podólogos un 9,7 %.

Unha enfermeira atende a unha paciente na UCI | Fonte: E.P.