Críticas por decretar loito por agresor e vítima no crime machista de Campo Lameiro

O Colectivo Feminista As Moiras censurou como "tremendamente indignante" que o Concello de Moraña, onde goberna o PP, decretase tres días de loito oficial pola morte de José Ramón G.C e de Marisol C. P., as dúas persoas que apareceron calcinadas en Campo Lameiro no que os investigadores tratan como un crime machista.

Este colectivo alerta de que incluír ao maltratador coa súa vítima nestes actos de duelo supón un "retroceso incalculable" no avance de toda a sociedade contra a violencia machista. En Moraña as bandeiras ondearán a media hasta e suspenderanse todos os actos públicos durante este tres xornadas, en sinal de dó "polos dous veciños desaparecidos", a cuxos familiares o goberno municipal mostran as súas "condolencias".

"As institucións públicas non poden invisibilizar desta maneira ás vítimas, cando deberían ser as garantes e o principal motor para a eliminación da violencia machista", subliñan desde As Moiras, unha asociación radicada no propio municipio de Moraña. As Moiras entende que "non se pode ignorar" que Marisol C. P. figuraba no sistema VioGén con risco alto e tiña unha orde de afastamento vixente e lembran que o agresor contaba cun amplo historial de antecedentes por violencia de xénero.

Nun comunicado, este colectivo empraza ao Concello de Moraña a que "reflexione e rectifique canto antes" e que se some á concentración convocada para este xoves ás 20,30 horas. Ademais, As Moiras esixe aos poderes públicos que se tomen "dunha vez por todas" a violencia machista como unha "prioridade política absoluta" impulsando medidas "serias, reais e efectivas" xa que "non serven as declaracións baleiras un día ao ano nin os lazos lilas mentres non se teña un compromiso total e real na loita contra esta violencia estrutural".

Tamén o BNG cualificou como "indignante e profundamente inapropiado" e un "grave paso atrás" que se equipare o respecto cara a unha muller maltratada co seu "maltratador sistemático", pondo a agresor e vítima "no mesmo nivel" nunha mostra dun comportamento "intolerable, indignante, insoportable e inxusto". Denuncian os nacionalistas que este é "unha mensaxe absolutamente errónea e perigoso á sociedade", co que "se pretende invisibilizar á verdadeira vítima".

Axentes da Garda Civil no lugar no que se atoparon os corpos | Fonte: S.F.F. - Arquivo