Minutos de silencio por toda Galicia tras o último asasinato machista

Os minutos de silencio en recordo da última vítima de violencia de xénero confirmada, esta en Fuengirola, sucedéronse este luns por toda Galicia. Así, o delegado do Goberno en Galicia, Pedro Blanco, presidiu na Subdelegación de Lugo o acto de condena por este último asasinato por violencia de xénero dunha muller de 43 anos no municipio malagueño o pasado 19 de xuño.

No acto, no que estivo presente a subdelegada do Goberno en Lugo, Isabel Rodríguez, así como os principais representantes públicos da cidade, o delegado transmitiu a súa solidariedade coa familia e achegados da vítima e reiterou o compromiso do Goberno por seguir traballando "man a man" co resto de de administracións e coa sociedade na eliminación de todas as violencias contra as mulleres. A corporación municipal de Lugo tamén asistiu a este minuto de silencio. Así mesmo, a corporación municipal de Ferrol tamén se sumou á homenaxe, gardando un minuto de silencio na Praza de Armas. Tal e como lembraron, coa malagueña, xa son 15 as vítimas mortais por violencia machista en 2025 en España, chegando ás 1.309 mulleres asasinadas desde 2003, cando se iniciou a recollida destes datos.

Teléfono de asistencia a vítimas de violencia de xénero | Fonte: MINISTERIO DE IGUALDADE