Rueda destaca a pluralidade galega na entrega das Medallas Castelao 2025

A Xunta de Galicia fixo entrega este sábado das Medallas Castelao 2025 nun acto celebrado no convento de San Domingos de Bonaval, en Santiago, no marco dun Ano Castelao que coincide co 75º aniversario do falecemento do intelectual rianxeiro. O presidente da Xunta, Alfonso Rueda, aproveitou o evento para defender que Galicia é “exemplo de consensos e unidade”, fronte ao individualismo que, segundo afirmou, se impón noutros contextos.

Durante a cerimonia, Rueda reivindicou a pluralidade como "unha das grandes fortalezas" da sociedade galega e asegurou que a identidade colectiva do país "non se constrúe no conflito, senón no acordo". Neste sentido, afirmou que a celebración do Ano Castelao “non busca reabrir feridas”, senón servir como espazo común para todas as visións sobre a figura do autor de Sempre en Galiza.

PREMIOS Á CULTURA, A SANIDADE E O COMPROMISO SOCIAL

Os galardóns recoñeceron este ano ao grupo musical Luar na Lubre, ao escritor e expresidente da Real Academia Galega, Víctor Freixanes, ao empresario Emilio Pérez Neto, á médica de familia Rosa Rodríguez Álvarez e á Asociación Galega de Afectados de Esclerose Lateral Amiotrófica (Agaela).

O presidente galego destacou a traxectoria de Luar na Lubre, banda fundada na Coruña en 1985, como clave para a proxección internacional da música tradicional galega e da súa vinculación coa cultura celta. O seu fundador, Bieito Romeu, agradeceu a distinción, salientando que a maior parte dos recoñecementos recibidos pola banda foron fóra de Galicia, e anunciou un novo disco para 2026, coincidindo co 40 aniversario do grupo.

No caso de Víctor Freixanes, Rueda eloxiou o seu labor como editor e como impulsor da cultura galega, ademais da súa capacidade de diálogo como presidente da RAG. O propio Freixanes aproveitou o seu discurso para reclamar unha acción decidida das forzas políticas no Pacto pola Lingua Galega, asegurando que "o futuro da lingua esixe compromiso".

En representación do tecido empresarial, a medalla recoñeceu o labor de Emilio Pérez Neto, que asumiu a dirección de Pérez Rumbao con só 23 anos. Para el, o galardón supón “un premio á cultura do esforzo”.

A médica Rosa Rodríguez, que vén de xubilarse tras 35 anos de servizo no centro de saúde de Adormideras (A Coruña), recolleu o premio en nome da Atención Primaria. Subliñou a importancia de reforzar este nivel asistencial, base do sistema sanitario público, e apelou ao respecto cara ao persoal sanitario.

Finalmente, Susana Seoane, vicepresidenta de Agaela, agradeceu emocionada o recoñecemento á asociación e puxo de pé ao público co seu discurso, no que salientou a necesidade de visibilizar a ELA e avanzar na integración das persoas afectadas.

UN ACTO CON AMPLA REPRESENTACIÓN INSTITUCIONAL

O evento contou coa presenza de numerosas autoridades, entre elas o presidente do Parlamento de Galicia, Miguel Anxo Santalices, o delegado do Goberno, Pedro Branco, o secretario xeral do PSdeG, José Ramón Gómez Besteiro, e a alcaldesa de Santiago, Goretti Sanmartín, así como o resto do Goberno galego. O conselleiro de Presidencia, Diego Calvo, foi o encargado de ler o decreto co nomeamento oficial dos premiados.

Tras a actuación da cantante Míriam Rodríguez, que abriu a cerimonia, os galardoados recolleron as súas medallas das mans do presidente da Xunta.

As Medallas Castelao, que se conceden cada 28 de xuño, conmemoran o regreso dos restos de Castelao a Galicia en 1984 e recoñecen a persoas ou entidades cuxa traxectoria resulta relevante para o desenvolvemento cultural, artístico, científico ou social do país. A edición deste ano, en pleno Ano Castelao, quixo subliñar, segundo Rueda, "a capacidade de Galicia para ser exemplo de convivencia e orgullo compartido".