O tráfico de colectores nos portos estatais galegos mellora os datos do conxunto de España

Os cinco primeiros meses do ano 2025 finalizaron para os cinco portos galegos de interese xeral (A Coruña, Ferrol, Vilagarcía, Marín-Ría de Pontevedra e Vigo) con peores datos globais que o exercicio anterior, pero en crecemento no que respecta á mercadoría xeral e os colectores.

Só Vigo presenta un balance xeral positivo en relación co ano pasado (un aumento do 1,5 %), mentres que os dous portos máis relevantes en termos de mercadoría caen un 12,3 % (A Coruña) e un 8,8 % (Ferrol-San Cibrao), respectivamente. Marín-Ría de Pontevedra déixase un 7 % e Vilagarcía, algo máis dun 2 %. O descenso nos graneis, tanto sólidos como líquidos, explica esta diminución que, con todo, non se extrapola á mercadoría xeral e, en concreto, ao movemento de colectores, mellorando así os datos do conxunto do sistema portuario de interese xeral.

En mercadoría xeral, só A Coruña cae (73.000 toneladas menos nos cinco primeiros meses do ano), mentres que Ferrol crece máis de 119.000 toneladas; Vigo, 30.000; Marín, 13.000 e Vilagarcía, 6.000. En toda España, este tráfico perde un 1,1 %. En colectores, os 28 portos de interese xeral melloran un 0,2 %, cando os cinco galegos soben preto dun 11 %, grazas ás 11.000 máis de Vigo e as 6.300 de Ferrol, que neutralizan as perdas de Marín (1.000 colectores menos) e Vilagarcía (700). Na Coruña non existe polo momento este tráfico.

O Porto Exterior de Ferrol estréase no tráfico de colectores | Fonte: EUROPA PRESS - Arquivo