Besteiro tacha de "hooligan" e "ultra" a Tellado: "Non será bo para España"

O secretario xeral do PSdeG, José Ramón Gómez Besteiro, tachou de "hooligan" e "ultra" ao ata agora portavoz do PP no Congreso e futuro secretario xeral, Miguel Tellado. Así se pronunciou este mércores nun acto despois de coñecerse que o líder do PP, Alberto Núñez Feijóo, volverá apostar polo que xa foi o secretario xeral do PPdeG en Galicia para tomar as rendas do partido a nivel estatal.

"Cando se pon a un hooligan, a un ultra, como secretario xeral, a política vai ser iso: ultra e propia dun hooligan", dixo Besteiro. Ademais, o socialista sostivo que o nomeamento de Tellado "non será bo para España" e "contraditorio co que o PP di defender en Galicia".

AUTOVÍA DA COSTA DA MORTE

Por outra banda, José Ramón Gómez Besteiro advertiu este mércores en Vimianzo que os socialistas "redobrarán" a súa "ofensiva" fronte á "negativa da Xunta" a levar a autovía da Costa da Morte ata Cee. "Redobraremos a nosa ofensiva en todas as institucións para pór fin a esta discriminación e garantir un trato digno aos veciños desta comarca", asegurou o xefe de filas do PSdeG ante o que cualificou de respostas "decepcionantes e preocupantes" do PP durante a semana pasada.

"Votaron en contra de todas as nosas propostas, tanto no Parlamento como na Deputación da Coruña", lembrou. O tamén portavoz do Grupo Socialista na Cámara autonómica achegouse ao momento no que finaliza a autovía xunto á alcaldesa de Vimianzo, Mónica Rodríguez; a de Cee, Margarita Lamela; o de Dumbría, Raúl González; a de Camariñas, Sandra Insua; o de Carnota, Juan Manuel Saborido; e os portavoces do PSdeG nos concellos de Muxía, Iago Toba, e Zas, Sheila Rial. Tamén se achegaron a deputada Patricia Iglesias e o secretario de Acción Territorial do PSdeG, Aitor Bouza.

Alí, xunto a todos eles, reclamou unha infraestrutura viaria "completa e sen peaxes", que chegue ata Cee e sexa gratuíta tamén no tramo entre Carballo e A Coruña. Besteiro sinalou que a autovía é clave para vertebrar a comarca, garantir a mobilidade e impulsar o seu desenvolvemento. Con todo, sostivo que "a cidadanía leva 17 anos esperando por unha infraestrutura" que, segundo indicou, os socialistas deixaron proxectada cando gobernaron a Xunta e que o PP "recortou".

Neste sentido, indicou que a lonxitude do trazado é un 35% interior, xa que pasou de 45 a 25 quilómetros, e aínda así o orzamento disparouse un 68% respecto ao proxecto do Goberno de Touriño.