O ferido na liorta de Ribeira evoluciona favorablemente e non se descartan novas detencións

O ferido hospitalizado na liorta rexistrada o pasado martes no Centro Recreativo de Artes, no municipio coruñés de Ribeira, evoluciona favorablemente e non se descartan novas detencións.

Así o trasladou ao ser preguntado polos medios este xoves o delegado do Goberno en Galicia, Pedro Blanco, quen lembrou que as forzas e corpos de seguridade reforzaron os controis para evitar que haxa "incidentes" tras o enfrontamento de dúas familias durante a celebración dunha pedida de man.

Nun acto en Lugo, o delegado explicou que se prevé que os detidos pasen a disposición xudicial e que os axentes seguen investigando e solicitando as imaxes que circulan nas redes, que están "a axudar a identificar as persoas que participaron" no altercado.

Precisamente, prevese que o seis arrestados en relación a esta pelexa que se saldou cun falecido e un ferido de gravidade pasen a disposición da xuíza do Tribunal de Instancia de Ribeira nº2. Con todo, non se desvelou cando para evitar incidentes.

Pedro Blanco insistiu en que a policía seguirá facendo o seu traballo para garantir a seguridade e insistiu en que Ribeira é unha "cidade segura" na que as forzas e corpos de seguridade traballan para "garantir esa seguridade custe o que custe".

Desfeitas no lugar no que ocorreron os feitos, a 2 de xullo de 2025, en Ribeira, A Coruña, Galicia (España). Unha persoa faleceu e varias foron detidas tras unha multitudinaria pelexa entre numerosos membros de dúas familias rexistrada onte, 1 d. Agostime - Europa Press | Fonte: Europa Press