Pontón reclama reforzar os centros de saúde e PAC en concellos que aumenten a súa poboación no verán

A portavoz nacional do BNG, Ana Pontón reclamou á Xunta que reforce os centros de saúde e a PAC daqueles municipios que aumentan a súa poboación durante o período estival, en lugar do que fai "habitualmente" o goberno galego, que é "recortar camas e servizos".

Pontón subliñou que, ademais da PAC, hai que reforzar os servizos de Atención Primaria con máis persoal, por iso pediu á Xunta que se manteñan operativos todos os servizos, así como camas e quirófanos, e probas diagnósticas, para o que esixiu que se fagan as contratacións e substitucións de persoal que sexan necesarias.

Respecto diso, advertiu de que se non se contrata persoal nestes momentos, seguirán aumentando as listas de espera, e tamén incidiu na importancia que se lle ofreza a este persoal boas condicións laborais.

"Acabar coa precariedade é o que vai facer que moitos médicos e médicas non escollan a opción de marcharse a outros lugares, porque o problema de fondo é a precariedade e os malos tratos que o PP leva cometendo nos últimos anos contra un persoal ao que hai que recoñecer o seu esforzo", remarcou Pontón.

SERVIZO DE URXENCIAS EN MOAÑA

A líder do BNG fixo estas consideracións en Moaña, onde mantivo unha reunión con representantes da mesa local de defensa da sanidade pública, na que tamén participaron a alcaldesa, Leticia Santos, e os deputados Montse Prado e Paulo Ríos.

Ana Pontón afirmou que o BNG vai seguir "firme" no seu apoio aos veciños de Moaña, que reclaman recuperar o servizo de Urxencias no municipio, e prometeu que a formación nacionalista redobrará esforzos no Parlamento de Galicia para que os moañeses teñan "o que lles corresponde e é de xustiza", é dicir, os mesmos servizos sanitarios que antes da pandemia.

A líder nacionalista subliñou o "exemplo de dignidade" dos veciños desta localidade na defensa da sanidade pública, con apoio do goberno local, e lembrou que levan 190 semanas reclamando a recuperación da PAC e a cobertura de todas as vacantes de facultativos, especialmente en horario de tarde.

Para Ana Pontón, esa posición confronta coa "soberbia e prepotencia" do goberno da Xunta, que segue facendo "oídos xordos" ás reivindicacións dos moañeses. "Hoxe en Moaña teñen menos servizos públicos que antes do Covid", denunciou, e lembrou que, no verán, o municipio ve aumentada notablemente a súa poboación.

Ademais, recalcou que situacións como esta non se limitan excepcionalmente a Moaña, senón que o goberno do PP "leva 16 anos aplicando unha política de recortes e privatizacións na sanidade pública" que sofren todos os galegos, porque os 'populares' queren que a saúde "sexa un negocio".

RESPOSTA DO PP

En resposta ás declaracións de Pontón, a secretaria xeral do PPdeG, Paula Prado, afirmou que nin a líder nacionalista nin a súa formación teñen "credibilidade" porque "o único que saben facer é criticar a gran sanidade pública" galega, en lugar de recoñecer o traballo dos profesionais.

Tras censurar que o BNG "alarma" á poboación, lembrou que os nacionalistas apoian a un goberno central e a un presidente do Executivo que, ademais de "amparar a corrupción", non fixeron nada "por solucionar o problema estrutural de déficit de profesionais que sofre o sistema nacional de saúde". "Levamos 6 ministros e cero soluciones", constatou.

Finalmente, Paula Prado lembrou que a Xunta levou a cabo a reforma do consultorio de Domaio en Moaña e está a terminar a construción do novo centro de saúde do municipio, actuacións que suman 9 millóns de euros. Ademais, o goberno galego ten a vontade de dotar á comarca do Morrazo dun Centro Integral de Saúde, "pero está á espera desde hai tempo de que o Concello de Cangas ceda os terreos necesarios".