Aparece un home afogado xunto a un barco envorcado en Moaña

Os servizos de emerxencias recuperaron o corpo sen vida dun home, de 72 anos de idade, que apareceu flotando no mar xunto a unha pequena embarcación envorcada en Moaña. Segundo informa o 112 Galicia, foi un particular quen, sobre as 9.15 horas da mañá deste martes, alertaba á central de emerxencias ao observar que había un barco envorcado e unha persoa que aboiaba ao seu carón.

Seguidamente, o 112 informou a Urxencias Sanitarias-061, a Salvamento Marítimo, a Gardacostas de Galicia, á Garda Civil, á Policía Local de Moaña e a Protección Civil do municipio. Salvamento Marítimo, Gardacostas e Garda Civil desprazaron ao lugar medios de rescate que, con todo, só puideron confirmar o falecemento da persoa.

Nestes momentos, as forzas da orde continúa coas tarefas de investigación para determinar as causas deste suceso e descartar que houbese máis persoas implicadas. Mentres tanto, a embarcación xa foi remolcada a terra.