Galicia apaga o seu incendio máis grande do ano: 578,7 hectáreas calcinadas en Vilardevós
O lume mantivo en alerta a veciñanza e mobilizou un amplo operativo, con 12 avións, 12 helicópteros e a Unidade Militar de Emerxencias.
Por Europa Press / Redacción | Santiago de Compostela | 08/08/2025 | Actualizada ás 15:37
O gran incendio forestal do municipio ourensán de Vilardevós quedou extinguido este venres tras arrasar 578,7 hectáreas desde que se declarou hai unha semana, o 1 de agosto. É o maior lume no que vai de ano en Galicia.
Este lume na parroquia de Terroso foi extinguido ás 12,24 horas deste 8 de agosto, segundo informa a Consellería do Medio Rural. Do total queimado, 519,62 hectáreas son de monte raso e 59,08 hectáreas, de arboledo.
Foi necesario activar a Situación 2 durante a noite do pasado domingo por risco para vivendas. Nas tarefas de extinción traballaron 12 avións, 12 helicópteros, 64 motobombas, 98 brigadas e a Unidade Militar de Emerxencias (UME), entre outros medios.
No tocante a outros incendios, o da Fonsagrada (Lugo), iniciado o martes na parroquia de Monteseiro, continúa activo e sen controlar despois calcinar 120 hectáreas. Si que está controlado neste municipio o da parroquia de Cereixido, que queima 20 hectáreas.
Por outra banda, están controlados os incendios de: Salceda de Caselas (Pontevedra), parroquia da Picoña (80 hectáreas queimadas); As Neves (Pontevedra), parroquia de San Pedro de Batalláns (50 hectáreas); Camariñas (A Coruña), parroquia de Xaviña (50 hectáreas); Ponteceso (A Coruña), parroquia de Corme Aldea (60 hectáreas); Ponteceso (A Coruña), parroquia de Brantuas (200 hectáreas); e As Pontes de García Rodríguez (A Coruña), parroquia de Ou Freixo (20 hectáreas).
