Un galego de récords

Fin de semana espectacular para Mauro Triana. O sábado, dous récords consecutivos nos 100 metros lisos para ser o primeiro galego na historia en baixar dos 10.50. E o domingo, nova proeza nos 200 metros, batendo por cinco centésimas un récord que tiña 33 anos de antigüidade. Total, dous ouros para o galego no Campionato de España promesa celebrado en Toledo, que lle serven para afianzarse de cheo na elite da velocidade estatal.

O coruñés Mauro Triana parou o crono na final dos 200 metros lisos en 21.07 segundos, superando deste xeito os 21.12 que acadara en 1983 Isidoro Hornillos, actual presidente da Federación Galega de Atletismo e candidato á presidencia da Federación Española. Antes, na semifinal, fixera un rexistro de 21.80 nunha carreira na que se trataba de dosificar esforzos cara a final. Cando o reloxo marcaba as 19.20 horas, deuse a saída a gran final, na que pola rúa catro o coruñés, moi seguro das súas posibilidades, parou o reloxo neses 21.07 segundos, batendo o récord con máis anos do ranking galego absoluto masculino. Era, ademáis, a súa segunda medalla de ouro na fin de semana.

Levaba xa tempo Mauro Triana avisando das súas posibilidades. O discípulo de José Carlos Tuñas, fichado esta tempada polo Playas de Castellón, amosa unha espectacular progresión nas últimas tempadas, que o levaron na actual campaña á internacionalidade e á participación coa selección española nos Xogos do Mediterráneo, onde acadou unha medalla no relevo 4x100. Precisamente, co 4x100 español, Triana podería participar o vindeiro mes no Europeo absoluto que se disputa en Amsterdam.