(Vídeo) Temor a que o buque que arde en Ribeira poida afundir con materiais contaminantes

Continúan os traballos de extinción do buque Awadi, que este luns comezou a arder no porto de Ribeira, onde está atracado. A tarefa máis perentoria é conseguir que o barco se manteña á boia. Así o explican os equipos desprazados á zona, entre os que se atopan dotacións dos bombeiros de Ribeira e Boiro, a Garda Civil, a Policía Nacional e Local, así como efectivos de Salvamento Marítimo, Gardacostas de Galicia e Portos de Galicia. Na zona están despregados un remolcador e o buque Mar de Galicia, que tratan de endereitar o barco, xa que o que máis preocupa é o seu posible afundimento.

O Awadi alberga miles de litros de combustible, ademais doutros materiais inflamables, que poderían verterse ao mar. Así, ademais de endereitalo, os medios desprazados tratan de alixeirar a carga do barco. Ademais, desde este luns pola noite xa están preparadas as barreiras anticontaminación por se fose necesaria a súa utilización. Esta noite bombeiros de quenda libre dos parques de Boiro e Ribeira foron solicitados para dar substitución, dado o "complicado" das tarefas de extinción. Outros buques de apoio, como a Ría de Vigo, atópanse "dispoñibles" por se fose necesaria a súa intervención.

PODERÍAN PASAR DÍAS ATA A EXTINCIÓN DEFINITIVA 

A "virulencia" do lume e a "elevadísima" temperatura no barco están a facer "moi difíciles" as tarefas de extinción. Desta forma valórao o alcalde de Ribeira, Luís Pérez, que apunta que, por este motivo, podería tardarse "mesmo días" en dalo completamente por extinguido. Os traballos de extinción están centrados actualmente en retirar material de peso da cuberta para estabilizar o barco, explica. "Un incendio nun barco é unha incidencia moi complicada basicamente porque ten moito material inflamable e combustible", expón o rexedor ribeirense. "Onte xa se demostrou que a virulencia do lume e, sobre todo, a elevadísima temperatura que hai neste momento do barco fan moi difíciles as tarefas de extinción", valora.

Está a valorarse, sinala, que o incendio poida tardar "mesmo días" en declararse "completamente extinguido" porque, a pesar de que non haxa chamas, hai "moitísima" temperatura no interior, que impide que os bombeiros poidan entrar nel. O Concello de Ribeira pediu aos veciños, a través das súas redes sociais, que eviten a zona do porto comercial "na medida do posible" e que eviten o contacto directo co fume que desprende o barco, para o que recomendan pechar as xanelas. O rexedor insiste en que este aviso estará vixente "durante o tempo que dure o incendio".

A PRIORIDADE É EVITAR O AFUNDIMENTO

Neste momento, os traballos están centrados en retirar todo o material de peso que hai na cuberta para "tentar mellorar a estabilidade do barco", que ten unha escora importante. Unha vez se retire todo ese material que pesa, van tratar de retirar "moi aos poucos" o remolcador que o está empuxando contra o porto e, así, "ver como se comporta a estabilidade do barco", explica Luís Pérez. "Se se mellora sería xenial porque se podería atacar mellor o incendio. Se non, terían que probar doutra maneira", engade.

No incidente interveñen dotacións dos bombeiros de Ribeira e Boiro, a Garda Civil, a Policía Nacional e Local, así como efectivos de Salvamento Marítimo, Gardacostas de Galicia e Portos de Galicia. Pola súa banda, Luís Pérez mostrou a colaboración do Concello de Ribeira a disposición das autoridades responsables para, deste xeito, colaborar en "evitar que o barco se vaia a pique". O Awadi, de 50,75 metros de eslora e 10,32 metros de manga, arde no porto de Ribeira desde preto das 17.00 horas da tarde do luns. O lume orixinouse na sala de máquinas mentres se realizaban tarefas de reparación. Ningunha persoa resultou afectada.

 

 

 

 

Ver esta publicación en Instagram

 

 

 

 

 

 

 

 

 

 

 

Una publicación compartida de Galicia Confidencial (@galicia_confidencial)