Os concellos galegos, "expectantes" e "esperanzados" cos cambios que haberá en 2026 no financiamento local
A Xunta reivindica que reforza nos orzamentos o fondo de cooperación ata os 187 millóns de euros.
Por Europa Press / Redacción | SANTIAGO DE COMPOSTELA | 14/10/2025 | Actualizada ás 13:18
Os concellos galegos amósanse "expectantes" e "esperanzados" cos cambios que haberá en 2026 no seu financiamento, tendo en conta que está pendente a aprobación, a mediados de ano, da nova lei de administración local. Así o expresou o presidente da federación galega de municipios e provincias (Fegamp), Alberto Varela, en declaracións aos xornalistas no seu despacho despois de acudir á sede da Xunta a reunirse cos conselleiros de Presidencia, Diego Calvo, e de Facenda, Miguel Corgos.
A Xunta, pola súa banda, reivindicou que reforzará o fondo de cooperación local nas contas para 2026 ata os 187 millóns de euros, segundo os seus números. "Un incremento catro veces por enriba da regra de gasto", resalta. En concreto, Corgos, na súa comparecencia ante a prensa con Calvo, subliñou que o incremento desta dotación é de case un 12 % con respecto á partida para 2025, que foi de 168 millóns. O titular de Facenda chamou a atención tamén sobre a creación de "un fondo adicional con 59 millóns de euros" que, segundo a consellería, está "destinado a blindar o financiamento da futura lei de administración local".
Pola súa banda, Diego Calvo explicou que unha vez aprobada dita lei entrarán en vigor os criterios recolleitos na nova norma. Así as cousas, o que vén é un ano "de transición" durante a súa tramitación e aplicarase "un réxime transitorio" como unha salvagarda para todos os municipios, "de maneira que non se reduzan os fondos pese ao cambio de criterios". O comunicado da Xunta e ambos os conselleiros indicaron que se terán en conta as propostas que a Fegamp leva anos realizando, motivo polo que Alberto Varela mostrou a súa "expectación" e "esperanza".
Pola súa banda, a Xunta afirma levar tamén "anos reclamando" ao Goberno central a definición dun novo modelo de financiamento local que teña presente as características da comunidade, como dispersión xeográfica e envellecemento, e que esa negociación se realice de forma paralela á do financiamento autonómico. Mentres dure o período transitorio, o fondo básico seguirá situado en 112 millóns de euros, aos que se suma unha contía de 6 millóns para repartir entre concellos de menos de 15.000 habitantes.
SAF
Por outra banda, preguntado polo servizo de axuda no fogar, o presidente da Fegamp dixo estar á espera de coñecer o borrador, para comprobar se todas as partes están "satisfeitas" co texto. En calquera caso, aplaudiu "que se mellore na seguridade" das profesionais deste servizo, á vez que apuntou á necesidade de incrementar outros aspectos como o das súas retribucións.
