Por E.P. | A CORUÑA | 31/10/2016 | Actualizada ás 18:22
O administrador de Rojadirecta chegou a ingresar once millóns de euros dende 15 contas bancarias que foron bloqueadas tras a investigación do Grupo de Delitos Tecnolóxicos da UDEF, que detivo o responsable desta web e outros cinco socios por unha suposta infracción de dereitos de propiedade intelectual en relación cos enlaces para eventos deportivos.
O sitio web ofrecía unha guía de eventos deportivos ordenados por hora de emisión, facilitando en cada un deles un índice de enlaces para acceder ao contido directo. A investigación, coordinada polo Xulgado do Mercantil número 1 da Coruña, iniciouse tras unha demanda interposta en 2015 por DTS (Canal +), adquirida por Telefónica.
Durante a operación leváronse a cabo rexistros en Madrid, Barcelona, Cádiz, Girona e Málaga, onde se interviñeron diversos dispositivos electrónicos empregados para desenvolver a actividade presuntamente delictiva, segundo informou a Policía nun comunicado.
Simultaneamente procedeuse á detención de Igor Seoane, administrador único de Rojadirecta, cando abandonaba a sede do xulgado da Coruña, onde prestara declaración, disfrazado con perruca, lentes e un casco de moto. Fontes do Tribunal Superior de Xustiza de Galicia (TSXG) aseguraron que esta declaración se celebrou o 26 de outubro por outra causa xudicial.
Na comparecencia previa á súa detención, Igor Seoane asegurou que os contidos da Liga española e da competición francesa supostamente infractores que aparecían na web eran engadidos polos usuarios e que a web só proporciona un servizo de "intermediario".
Tamén argumentou que a única fonte de ingreso da súa empresa provén das casas de apostas e negou en todo momento calquera tipo de "relación comercial" cos usuarios que agregan á web eses eventos e enlaces. "Non teño relación con ninguén, nin con contido nin legal nin ilegal, agás cos clientes como son as casas de apostas", subliñou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.