A Asociación de Novos Empresarios de Pontevedra entrega o seu premio honorífico á conservera Orbe

A Asociación de Novos Empresarios de Pontevedra (AJE) contou este venres coa visita de Juan José Vicente Álvarez, fillo de José Ignacio Vicente Orbe, que recibiu o Premio Honorífico do XXI Premio Xove Empresario do Ano.

AJE Pontevedra decidiu premiar unha traxectoria empresarial que empezou hai 80 anos, a da conservera Orbe, agora instalada no polígono empresarial da Reigosa, despois do seu traslado dende Vigo.

A presidenta dos novos empresarios pontevedreses, Lucía Pedroso, destacou que á fronte desta empresa familiar con 149 empregados atopa a terceira xeración "con todas as consecuencias que isto adoita implicar".

O actual xerente, Juan José Vicente Álvarez, explicou os seus plans de expansión que inclúen trasladar a Ponte Caldelas o actual almacén situado en Vigo e ampliar entre 80 e 90 persoas máis o seu equipo.

Juan José Vicente recordou os inicios do seu avó en 1937 nun garaxe de Vigo traballando con produtos salazón para máis adiante especializarse na fabricación de conservas de peixe.

Ao longo destes 80 anos tiveron que xuntar esforzos para superar unha guerra civil e unha guerra mundial, a desaparición progresiva dos nosos caladeros, a innovación tecnolóxica e a modernización da maquinaria entre outros, desafíos que supuxeron un reto para a supervivencia empresarial da fábrica. Como curiosidade, Orbe foi a primeira conservera en incorporar as chaves nas latas para abrilas.

Juan José Vicente Álvarez desvelou que unha das claves do seu éxito é que exportan a maioría da súa produción con 241 referencias de produtos, xa que traballan á medida do que o mercado os demanda. Da nave da Reigosa salguen unhas 150.000 latas diarias na actualidade.

O acto de entrega do galardón honorífico celebrarase o próximo 11 de novembro no Liceo Casino de Pontevedra.