Banco de Alimentos de Vigo busca outros 300 voluntarios para a Grande Recollida Solidaria do 25 e 26 de novembro

A Fundación Provincial Banco de Alimentos de Vigo fixo un chamamento para completar o cadro de voluntarios cos que levará a cabo a Grande Recollida Solidaria dos días 25 e 26 de novembro, e para que a que necesita aínda 300 persoas máis.

Neste momento, medio millar de vigueses anotáronse para participar nesta acción, e xa teñen asignados os supermercados nos que traballarán para realizar a recollida de alimentos. Pero aínda se necesitan outros 300 voluntarios para a cidade, e tamén para O Porriño e Moaña.

Para ser voluntario só hai que ter 4 horas libres, e anotarse na páxina web www.bancoalimentosvigo.org/formulario, ou ben no teléfono 986.263022.

Por outra banda, o Banco de Alimentos informou de que, o próximo 22 de novembro, persoal desta ONG ofrecerá unha charla no salón de actos dos PP. Capuchinos en Vázquez Varela para ensinar aos voluntarios a dinámica da Gran Recollida.

En toda a provincia, a organización mobilizará 1.500 voluntarios durante esa fin de semana para recoller alimentos non perecedoiros en 150 supermercados e hipermercados. Entre eses voluntarios estará, o 25 de novembro, o padriño da Grande Recollida deste ano, o xornalista de El Intermedio, 'Gonzo'.