Desaparece un artigo da web de Galicia Hoxe tras protestar a Igrexa

O diario Galicia Hoxe publicou este xoves un artigo de opinión de Fran P. Lorenzo crítico coa inminente visita do Papa. O comunicador atacaba os “controis policiais, restrición do tráfico e rexistros domiciliares, incluídos, que afectarán singularmente a todas e todos aqueles cuxa vontade e albedrío van ser vulnerados en aras dun rédito político que, con iso contan os organizadores do sarao, beneficiará a todos os persoeiros que teñan acceso á fotografía oficial”.

"Insulto despiadado"

Ao día seguinte, o Arcebispado de Santiago deu a coñecer o “seu profundo disgusto” nun comunicado. Os curas argumentan que “a libertad de expresión no es una patente de corso para el insulto despiadado y la manipulación de escasísimo gusto, por otra parte, de una fotografía que por su exceso y zafiedad suscita un rechazo inmediato”.

A "fotografía" á que se refire o Arcebispado é en realidade unha fotomontaxe humorística tamén reproducida nesta noticia por Galicia Confidencial. É a mesma que se pode atopar na contraportada do Galicia Hoxe en papel do xoves, o nde Fran P. Lorenzo publica todas as semanas os seus artigos de opinión.

GC non pode enlazar ao artigo porque este desapareceu da web de Galicia Hoxe tras a protesta dos relixiosos. O texto, que ataca duramente á Igrexa por pedir cartos aos fieis para pagar a visita de Bieito XVI, tampouco figura en “Vai de blog”, a columna semanal deste autor no xornal.

Galicia Hoxe é parte da Editorial Compostela, tamén dona de El Correo Gallego, diario con moi bos contactos na cúpula da curia santiaguesa.

Google burla a censura de contidos unha vez publicados

Con todo, “Coma nenos píos con disfrace de mártire” aínda se pode ler gracias a caché de Google.

Google fai copia de todas as páxinas que visitan os robots que alimentan o seu potentísimo buscador. Isto permítelle responder moi rápido ás buscas. De paso tamén permite albiscar que contidos foron borrados ou corrixidos nunha páxina web unha vez publicados.