Problemas coas conexións de R
Este mércores cara mediodía a marca galega daba conta dunha “incidencia móbil” nas súas liñas. “O problema que afectou a algunhas liñas móbiles xa está identificado e están a recuperar o servizo gradualmente”, indicaba R nas súas redes sociais.
Por Galicia Confidencial | A Coruña | 27/09/2017 | Actualizada ás 14:42
A empresa estimaba que cara as 12:30 todo estivera solventado pero, visto as queixas que se acumulan nas redes sociais, non foi así.
INCIDENCIA. A maior parte das liñas xa pode chamar e recibir chamadas. En canto aos datos móbiles, o servizo está en proceso de recuperación
— R (@os_de_R) 27 setembro 2017
Mentres a operadora insistía en que “a maior parte das liñas xa pode chamar e recibir chamadas” contra as 13:30 numerosos internautas insistían que, malia reiniciar os móbiles como pedía a compañía, seguían sen datos despois, nalgúns casos, de seis horas sen cobertura.
R deixou aberta a posibilidade de ofrecer compensación aos seus clientes polos prexuízos causados, do mesmo xeito que fixo en anteriores ocasións nos que houbo problemas coa liña. Cómpre lembrar que R é un operador móbil virtual, que, ao contrario co que sucede coa súa propia liña de fibra óptica, non ten unha rede de seu para móbiles, senón que a aluga a outros operadores.
