Puy calcará a receita que derrotou a Touriño
O líder da estratexia do PPdeG adianta as claves do programa marco para vencer aos bipartitos das cidades. Vídeo de maior formato no interior.
Por Galicia Confidencial | Santiago | 01/12/2010 | Actualizada ás 01:14
O voceiro de Economía e Facenda do PPdeG, Pedro Puy, indicou o martes que os eixos fundamentais do programa electoral dos populares para as vindeiras municipais serán tres: "a austeridade na Administración", "a eficiencia no gasto público" e o "impulso ao emprego".
Trátase basicamente da mesma estratexia que Puy codeseñou para encubrar a Feijóo. Como novidade, os 'populares' aproveitaran a súa presencia da Xunta para prometer grandes construcións. Por exemplo, Gerardo Conde Roa xa anda facendo campaña polo AVE a Lavacolla, mentres o conselleiro de Infraestructuras anuncia un estudio sobre esta infraestructuras.
Puy dirixiu a primeira reunión coa Comisión Redactora do Programa Electoral, recentemente constituída e que el mesmo lidera. Segundo explicou, a susodita Comisión está formada por xente nova, en total 16 membros que aúnan, non só a súa pertenza ao PP, senón tamén a súa experiencia na xestión local e a dedicación á reflexión teórica no ámbito universitario.
Puy matizou que as persoas que redactarán o programa electoral do PP son "representantes de todo o territorio, que proveñen tanto de concellos do interior, como da costa, do rural ou urbanos".
O dirixente popular tamén informou de que durante a xuntanza de hoxe xa se foron establecendo os primeiros calendarios dos encontros que manterá a Comisión e das reunións que levará a cabo coa sociedade civil coa intención de palpar sensibilidades e detectar as súas demandas nun momento de dificultade económica como o que se está a vivir e que afecta a moitos sectores produtivos locais.
Nesta liña, Puy fdestacou que o programa electoral será "participativo e aberto e estará deseñado tendo en conta dita conxuntura económica e priorizando as medidas que afonden na austeridade dos Gobernos locais, na eficiencia do gasto público e no impulso ao emprego, coa fin de mellorar o benestar dos cidadáns e revertir os efectos da crise nos concellos".
