Por Galicia Confidencial | Compostela | 15/03/2018 | Actualizada ás 11:04
Galicia ten refuxiados sirios, poucos, pero algúns deles, en penosas circunstancias. Dentro do programa de acollida ás persoas refuxiadas fuxidas da guerra e traídas a España para a súa protección e integración, actualmente hai dúas familias nun estado de “total desprotección, abandono e nunha situación de vulnerabilidade extrema”, segundo denuncia Acampa.
Esta entidade asegura que, sen previo aviso, se lles retirou toda a axuda, deixándoas nunha situación de “total desamparo e confusión” e “sen recursos, sen posibilidades económicas e sen apoio para a identificación dun itinerario laboral fundamental para a súa integración”. “A situación actual é desesperada xa que ademais estas persoas están traumatizadas, moi afectadas psicoloxicamente polas vivencias da guerra”, engade nun comunicado.
Así, denuncia que a administración pública incumpriu a maior parte dos compromisos establecidos para a súa integración, “descoidando aspectos tan básicos como a aprendizaxe do idioma e tan fundamentais como o apoio psicolóxico, a asistencia sanitaria ou o apoio legal e administrativo, imposibilitando que poidan atopar medios de vida que lles permitan ser autosuficientes”.
Por todo isto, Acampa fai un chamamento á cidadanía para solidariamente paliar “o que as institucións non fixeron” e axude económicamente a estas familias a través dunha doacion. Máis información no correo comunicacion@acampa.eu ou no teléfono 607 486 482.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.