O PP quédase só en condenar no Parlamento a "un sector sindical" da folga na Xustiza

O Partido Popular aprobou en solitario que o Parlamento de Galicia condene as actitudes mostradas por "un sector sindical" na folga da Xustiza, ao que acusa de "insultar" aos traballadores que acudiron a votar o pasado 27 de abril en asembleas a oferta presentada pola Xunta para pór fin á folga indefinida. A proposta contou co voto en contra do BNG e a abstención de PSdeG e En Marea.

"Creo que todos os que estamos aquí condenamos as imaxes que vimos..., mesmo se produciron danos no vehículo dun particular", manifestou o deputado popular Jacobo Moreira este mércores no pleno da Cámara, escenario no que asegurou que esta votación, na que un 52,8% dos funcionarios dixo "non" á proposta da Xunta, non se desenvolveu nin baixo un "clima" adecuado nin "coas garantías necesarias".

Moreira foi o encargado de defender unha proposición non de lei a través da que, inicialmente, o PPdeG só pedía instar o Ministerio de Xustiza para que continúe coa creación de novas unidades xudiciais en Galicia en atención á carga de traballo. Este punto foi aprobado coa abstención de toda a oposición, despois de que non fosen aceptadas as súas emendas con propostas sobre esta cuestión.

A esta petición inicial, a través dunha autoenmenda, os populares engadiron outras dúas reclamacións. Así, ademais da que solicitaba condenar a actitude dun "sector sindical", incorporaron outro apartado no que se urxía "proceder a unha solución do conflito a través da firma por parte das organizacións sindicais do acordo nos termos propostos pola Xunta" que "coinciden co mandado unánime" expresado polo Parlamento en decembro de 2017.

Este punto tamén foi aprobado en solitario polos populares, ao absterse En Marea e PSOE, e votar en contra o Bloque.

Na súa intervención, o parlamentario do PPdeG emprazou os sindicatos a "tomar nota" das cifras de seguimento do paro, despois de que o martes alcanzasen o seu mínimo histórico, por baixo do 4%. "Cando a folga foi convocada, nós tomamos nota e, agora que apenas ten seguimento, esperamos que os sindicatos tomen nota, porque é necesario acabar con este conflito e asinar o acordo que está encima da mesa", considerou

CRÍTICAS DA OPOSICIÓN

Todos os grupos da oposición coincidiron ao censurar que a "primeira iniciativa" que o PPdeG leva á Cámara "en catro meses" sobre o conflito na Xustiza non inclúa ningunha proposta de solución.

En primeiro lugar, Luís Bará (BNG) acusou ao PP de "manipular e mentir" con "absoluto descaro". Así, asegurou que son os traballadores os que teñen o dereito a decidir se o acordo cumpre as súas reivindicacións. "Non conseguiron gañar a votación e por iso agora teñen este espírito de vinganza", sinalou antes de responsabilizar o vicepresidente da Xunta, Alfonso Rueda, de que "o conflito aínda non estea solucionado".

Pola súa banda, a socialista Patricia Vilán afeou aos populares que "non presentasen nin unha soa iniciativa relativa ao conflito na Cámara" a pesar de ter a capacidade de presentar proposicións non de lei de carácter urxente. "Demostran que non lles interesa nin o conflito nin a xustiza", incidiu.

Despois dela, Carmen Santos (En Marea) censurou que o Goberno galego estea "máis preocupado" de "terxiversar os motivos da folga" e "criminalizar" para tapar o fracaso de Alfonso Rueda, que de "solucionar o conflito". "Vostedes tentan responsabilizar aos que loitan polos dereitos laborais. Deberían tomar conciencia de que unha administración se non funciona supón un dano para toda a cidadanía", apuntou.