Xunta, TSXG e CGPJ reúnense este luns para abordar o plan de recuperación despois da folga de xustiza
O obxectivo da reunión é trazar o plan de recuperación do traballo despois do fin da folga dos funcionarios de xustiza que provocou a paralización dos xulgados galegos.
Por E.P. | SANTIAGO DE COMPOSTELA | 10/06/2018 | Actualizada ás 12:40
Representantes do Consejo General del Poder Juicial, o Tribunal Superior de Xustiza de Galicia e a Xunta manterán este luns unha reunión para abordar a articulación do plan de recuperación do traballo nos xulgados galegos após o fin da folga dos funcionarios da Administración de Xustiza.
O encontro terá lugar na sede do TXSG, na Coruña, e contará coa participación do vicepresidente do Goberno galego, Alfonso Rueda, o vogal do CPGJ Juan Manuel Fernández e o presidente do TSXG, Miguel Ángel Cadenas.
O obxectivo da reunión é trazar o plan de recuperación do traballo após o fin da folga dos funcionarios de xustiza que provocou a paralización dos xulgados galegos durante case tres meses.
O paro indefinido arrincou o 7 de febreiro e, durante os seus case 100 días de duración, estímase que foron suspendidos máis de 25.000 xuízos, así como milleiros de trámites xurídicos.
