A Xunta recoñece que non pode cubrir agora a praza de pediatra de Coruxo, en Vigo

O conselleiro de Sanidade, Jesús Vázquez Almuiña, ratificou que non desaparecerá a praza de pediatra do centro de saúde de Coruxo, en Vigo, aínda que argumentou que "neste momento" non a poden cubrir porque "o que pasou é unha xubilación" nun período "no que non hai pediatras".

Nunha entrevista na Cadena Ser, Vázquez Almuiña explicou que neste momento "non hai pediatras para poder contratar porque están noutras accións: cubrindo vacacións, baixas..."; aínda que aclarou que en Sanidade non decidiron, "desde logo, nin moito menos, tomar esa medida de que desapareza esa praza".

"Esa praza está aí, pero neste momento non a podemos cubrir, e o que facemos é centralizar nun centro de saúde moi próximo", apuntou. Así, manifestou que os nenos poden ser atendidos por pediatras no centro de Navia ou por médicos de familia no centro que lles corresponde, ao que se suma "a cobertura" de pediatría no Hospital Álvaro Cunqueiro.

En relación con todo isto, explicou que o problema de pediatras non se dá só en Galicia, senón que no conxunto estatal "hai paro cero en pediatría". "Por tanto, temos unha dificultade en períodos vacacionais e temos que buscar ese equilibrio entre manter a asistencia e dar vacacións aos nosos profesionais", remarcou.

Segundo mantivo, ante esta situación en Sanidade adoptaron medidas, como ampliar a idade de xubilación para que, de forma voluntaria, os pediatras poidan pedir unha prórroga para seguir traballando até os 68 anos, ou demandar ao Ministerio de Sanidade que permita formar a máis destes profesionais (actualmente dispoñen de 20 prazas por ano).

Finalmente, di que tamén introduciron "outras melloras", como tratar de diminuír o número de pediatras itinerantes (algúns desprázanse a dous ou tres localizacións na mesma mañá e perden tempo de atención directa a nenos), e crear prazas de enfermeira especialista en pediatría. "Galicia aposta claramente polos pediatras en atención primaria", asegurou.

APARCADOIRO DO HOSPITAL CUNQUEIRO

Noutra orde de asuntos, o conselleiro referiuse tamén ao litixio entre a concesionaria do Hospital Álvaro Cunqueiro e a empresa contratada para explotar o parking do centro hospitalario. Sobre iso, aínda que dixo que a Xunta non pode "entrar" neste tema, si que referendou que "o servizo está asegurado".

"Hai unha discusión entre estas dúas empresas, pero é un tema no que nós non podemos entrar", remarcou, incidindo en que, en todo caso, este aparcadoiro "está a dar moi bos resultados".

Finalmente, aseverou que a Xunta revisa "sempre" coa concesionaria "todas as seccións e servizos" que presta e "vixía que a calidade do servizo sexa adecuada".