Controlado un dos incendios do parque natural de O Invernadoiro

Un dos incendios iniciados na tarde do mércores no parque natural de O Invernadoiro, en Vilariño de Conso, foi controlado polos medios de extinción, mentres que o outro se atopa "estabilizado". En conxunto, afectan a 110 hectáreas, segundo a información facilitada pola Consellería do Medio Rural.

Ambos os lumes comezaron ás 16,10 horas do mércores, na parroquia de San Mamede de Hedrada, separados por apenas 500 metros, ao parecer por mor dunha tormenta seca. Un dos lumes, que afectou a 13,68 hectáreas de monte raso, foi controlado durante a tarde deste sábado. O outro, que permanece estabilizado, calcinou unhas 96 hectáreas, segundo datos da Xunta.

Nas tarefas de extinción traballaron desde o mércores 4 técnicos, 37 axentes, 83 brigadas, 37 motobombas, 5 pas, 14 helicópteros e 7 avións. A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal.